নিয়মীয়া বাৰ্তা, ২০ আগষ্টঃ নেইমাৰ, এঞ্জেল ডি মাৰিয়া, কিলিয়ান এমবাপে আদিৰ দৰে তাৰকাৰে সমৃদ্ধ পেৰিছ ছেইণ্ট জার্মেইনে প্রথমবাৰৰ বাবে চেম্পিয়নছ লীগৰ ফাইনেলত প্রৱেশ কৰিছে৷ মঙলবাৰে নিশা লিছবনত অনুষ্ঠিত প্রতিযোগিতাৰ ছেমিফাইনেলত পি এছ জিয়ে লিপজিগক ৩–০ গ’লত পৰাস্ত কৰিবলৈ সক্ষম হয়৷
দলটোৰ এই ঐতিহাসিক জয়ৰ মূলতেই আছিল এঞ্জেল ডি মাৰিয়া, মার্কুইনহ’ছ, জুৱান বার্নেট আৰু নেইমাৰৰ চমকপ্রদ প্রদর্শন৷ নৱাগত দল লিপজিগৰ ৰক্ষণ বিভাগৰ দুর্বলতাৰ সুযোগ গ্রহণ কৰি মেচৰ ১৩ মিনিটতে পি এছ জিয়ে প্রথমটো অগ্রগতি অর্জন কৰে৷
মার্কুইনহ’ছে ১৩ মিনিটত গ’লটো কৰিবলৈ সক্ষম হয়৷ ইয়াৰ পিছত ৪২ মিনিটত এঞ্জেল ডি মাৰিয়াই পি এছ জিৰ দ্বিতীয়টো সফলতা কঢ়িয়াই আনে৷ ৫৬ মিনিটত জুৱান বার্নেটে দলটোৰ হৈ তৃতীয়টো গ’ল কৰি পি এছ জিৰ বিজয় সুনিশ্চিত কৰে৷ উল্লেখ্য যে বিগত তিনি বছৰ ধৰি পি এছ জিয়ে চেম্পিয়নছ লীগৰ কোৱার্টাৰ ফাইনেলতে অভিযান সামৰিছিল৷