নিয়মীয়া বাৰ্তা, ৩ ছেপ্টেম্বৰ: আর্জেণ্টিনাৰ তাৰকা ফুটবলাৰ লি’নেল মেছিয়ে বার্চিলোনা এৰাটো প্রায় নিশ্চিত হৈ পৰিছে৷ বিশ্ব শ্রেষ্ঠ ফুটবলাৰগৰাকীয়ে বার্চিলোনা এৰি মানচেষ্টাৰ চিটীত যোগদান কৰাটো পূর্ণ সম্ভাৱনা আছে৷ ছবাৰকৈ বেলন ডি অ’ৰ বঁটা বিজয়ী মেছিয়ে ৭০০ মিলিয়ন ডলাৰৰ বিনিময়ত ইংলিছ প্রিমিয়াৰ লীগৰ ক্লাব মানচেষ্টাৰ চিটীৰ হৈ খেলিবলৈ সন্মত হৈছে বুলি সংবাদ প্রতিষ্ঠানৰ এক সূত্রত এই কথা সদৰী৷
আর্জেণ্টিনাৰ তাৰকা ফুটবলাৰগৰাকীয়ে ৫ বছৰৰ বাবে চিটীৰ সৈতে চুক্তিবদ্ধ হোৱাৰ সম্ভাৱনা আছে বুলি সংবাদ প্রতিষ্ঠানৰ সূত্রটোত লগতে সদৰী৷ অৱশ্যে এই সন্দর্ভত লি’নেল মেছিয়ে কোনোধৰণৰ মন্তব্য আগবঢ়োৱা নাই যদিও মেছিৰ পিতৃ তথা তেওঁৰ এজেণ্ট জর্জ মেছিয়ে কৰা এক মন্তব্যৰ পিছতে লি’নেল মেছিয়ে বার্চিলোনা এৰাটো প্রায় নিশ্চিত৷ সংবাদ প্রতিষ্ঠানৰে হোৱা এক বার্তালাপত মেছিৰ পিতৃ জর্জ মেছিয়ে কয় যে লি’নেল মেছিয়ে বর্তমান সময়ত বার্চিলোনাত থকাটো কঠিন হৈ পৰিছে৷ অচিৰেই তেওঁ লা লিগাৰ ক্লাবটো এৰাৰ সম্ভাৱনা আছে৷ অৱশ্যে মানচেষ্টাৰ চিটীৰ মেনেজাৰ পেপ গৌৰডি’লাৰ সৈতে কোনোধৰণৰ কথা–বতৰা চলা নাই বুলি উল্লেখ কৰি মেছিৰ পিতৃগৰাকীয়ে লগতে কয় যে মেছিয়ে বার্চিলোনা এৰাটো প্রায় খাটাং৷ ২০১৭ চনত ৪ বছৰৰ বাবে বার্চিলোনাৰ সৈতে চুক্তিবদ্ধ হোৱা ৩৩ বছৰীয়া মেছিৰ ২০২১ চনৰ জুন মাহত দলটোৰে চুক্তিৰ ম্যাদ অন্ত পৰিব৷
যদি মেছিয়ে চুক্তিৰ ম্যাদ অন্ত নপৰাৰ পূর্বে বার্চিলোনা এৰিব বিচাৰে, তেতিয়াহ’লে তেওঁ ৮৩ কোটি ৭০ লাখ ডলাৰ বার্চিলোনাক দিব লাগিব বুলি দলটোৰ এক বিবৃতিত সদৰী৷ উল্লেখ্য যে লি’নেল মেছিয়ে ৭৩১খন মেচত বার্চিলোনা দলটোক প্রতিনিধিত্ব কৰি ৬৩৪টা গ’ল স্ক’ৰ কৰিবলৈ সক্ষম হয়৷