নিয়মীয়া বাৰ্তা, ৫ ছেপ্টেম্বৰঃ আজি শিক্ষক দিৱসৰ লগত সংগতি ৰাখি সদৌ অসম লেখিকা সমাৰোহ সমিতিৰ অন্তৰ্গত সোণাৰি চাপৰি লেখিকা সমাৰোহ সমিতিয়ে ঘৰে ঘৰে গৈ অঞ্চলটোৰ দুই কীৰ্তিমান শিক্ষক-শিক্ষয়িত্ৰীক সম্বৰ্ধনা জনাই গুৰু বন্দনা কৰে ৷
আজি পুৱা ৬ বজাত সোণাৰি চাপৰি লেখিকা সমাৰোহ সমিতিয়ে পোন প্ৰথমবাৰৰ বাবে সোণাৰি চাপৰি ট্ৰাইবেল হাইস্কুলৰ অৱসৰপ্ৰাপ্ত প্ৰধান শিক্ষক তথা প্ৰবন্ধকাৰ হেমচন্দ্ৰ গগৈক ফুলাম গামোচা, চেলেং চাদৰ আৰু গ্ৰন্থৰ টোপোলাৰে নিজ গৃহত সম্বৰ্ধনা জনায়৷ ইয়াৰ পিছতেই লেখিকা সমাৰোহ সমিতিয়ে ঢোলপেটা প্ৰাথমিক বিদ্যালয়ৰ অৱসৰপ্ৰাপ্ত প্ৰধান শিক্ষয়িত্ৰী ললিতা বৰগোহাঁইক নিজা বাসগৃহত গৈ সম্বৰ্ধনা জনাই শিক্ষক বন্দনা কৰে ৷
লেখিকা সমাৰোহ সমিতিৰ সম্পাদিকা তথা শিক্ষয়িত্ৰী ৰীণা চুতীয়াই আঁত ধৰা আৰু সভানেত্ৰী তথা অৱসৰপ্ৰাপ্ত শিক্ষয়িত্ৰী নলিনী বুঢ়াগোহাঁইৰ নেতৃত্বত অনুষ্ঠিত শিক্ষক বন্দনা কাৰ্যসূচীত সমাৰোহ সমিতিৰ সকলো বিষয়ববীয়াই অংশগ্ৰহণ কৰে ৷