১০ বছৰৰ ভিতৰত নির্মাণ সম্পূর্ণ হ’ল মানালি–লেহ সংযোগী ‘অটল সুৰংগ’ৰ

নিয়মীয়া বাৰ্তা ১৭ ছেপ্টেম্বৰঃ   বিশ্বৰ দীর্ঘতম ঘাইপথ সুৰংগ ‘অটল সুৰংগ’ৰ নির্মাণ সম্পূর্ণ হৈ উঠিছে৷ হিমাচল প্রদেশৰ মানালিৰ পৰা লেহ সংযোগী এই অটল সুৰংগ সাগৰ পৃষ্ঠৰ পৰা ১০ হাজাৰ ফুট উচ্চতাত নির্মাণ কৰা হৈছে৷ ৯.০২ কিলোমিটাৰ দৈর্ঘ্যৰ এই সুৰংগটোৰ নাম প্রাৰম্ভিক অৱস্থাত ৰোহতাং সুৰংগ হিচাপে আছিল যদিও পিছলৈ ইয়াৰ নামকৰণ প্রাক্তন প্রধানমন্ত্রী অটল বিহাৰী বাজপেয়ীৰ নামেৰে অটল সুৰংগ কৰা হয়৷ ২০১০ চনৰ ২৮ জুনত নির্মাণৰ কাম আৰম্ভ কৰা অটল সুৰংগটোৰ ৬ বছৰৰ ভিতৰতে অটল সুৰংগটো নির্মাণ সম্পূর্ণ কৰাৰ পৰিকল্পনা আছিল যদিও এই সুৰংগটো দহ বছৰৰ ভিতৰত নির্মাণ সম্পূর্ণ হৈছে৷ প্রায় ৫০০ কোটি মার্কিন ডলাৰ ব্যয়সাপেক্ষ এই সুৰংগটোৰ নির্মাণৰ দায়িত্বত আছে ব’ডাৰ ৰোডছ অর্গেনাইজেচন (বি আৰ অ’)৷ দুই লেনযুক্ত এই সুৰংগটোৰ প্রতি ৬০ মিটাৰত চিচি টিভি কেমেৰা সংযুক্ত কৰা হৈছে আৰু প্রতি ৫০০ মিটাৰৰ মূৰে মূৰে প্রস্থান গেট ৰখা হৈছে৷ এই সুৰংগটোৰে যাত্রা কৰিলে মানালি আৰু লেহৰ মাজত দূৰত্ব ৪৬ কিলোমিটাৰ হ্রাস পাব লগতে যাত্রাৰ সময় ৪ ঘণ্টা হ্রাস পাব৷ সুৰংগটোত যান–বাহনে প্রতি ঘণ্টাত ৮০ কিলোমিটাৰ বেগত যাত্রা কৰিব পাৰিব৷ যিকোনো অগ্ণিকাণ্ড নির্বাপণৰ কাৰণে সুৰংগটোত অগ্ণিনির্বাপক সঁজুলি সংযুক্ত কৰা হৈছে৷ সুৰংগটোৰ প্রস্থ ১০.৫ মিটাৰ৷ ইয়াৰ মাজত ১ মিটাৰৰ দুয়োকাষে পদপথ আছে৷ অত্যাধুনিক প্রযুক্তিৰে নির্মাণ কৰা এই সুৰংগটো লক্ষণীয়ভাৱে দুয়োমূৰৰ পৰা নির্মাণ কৰা হৈছে৷ অটল সুৰংগ প্রকল্পৰ সঞ্চালক কর্নেল পৰীক্ষিত মেহেৰাই প্রকাশ কৰা মতে, সুৰংগটো নির্মাণৰ ক্ষেত্রত অনেক বিশেষজ্ঞৰ সহায় লোৱাৰ লগতে বিশেষজ্ঞৰ দ্বাৰা নির্মাণ সম্পূর্ণ কৰা হৈছে৷