নিয়মীয়া বার্তা, ২৫ ছেপ্টেম্বৰঃ চলিত বর্ষৰ ২৭ অক্টোবৰৰ পূর্বে বিটিচি পৰিষদীয় নির্বাচন অনুষ্ঠিত কৰিবলৈ ৰাজ্যিক নির্বাচন আয়োগক আহ্বান জনাইছে কেন্দ্রীয় যুৱ বিপিএফে৷ যুৱ বিপিএফৰ কেন্দ্রীয় সমিতিৰ সাধাৰণ সম্পাদক সোমনাথ বসুমতাৰীয়ে কালি বিবৃতিযোগে এই আহ্বান জনাই কয় যে বিগত ৪ এপ্রিলত বিটিচি পৰিষদীয় নির্বাচন অনুষ্ঠিত হোৱাৰ কথা আছিল৷ কিন্তু ক’ভিড–১৯ৰ ভয়াৱহ সংক্রমণৰ বাবে ৰাজ্যিক নির্বাচন আয়োগে বিটিচি পৰিষদীয় নির্বাচন স্থগিত ৰাখে৷
তাৰ কিছুদিন পিছত বিটিচিত ৰাজ্যপালৰ শাসন বলৱৎ কৰা হয়৷ কিন্তু বিগত ছয় মাহে বিটিচিবাসী জনসাধাৰণ উন্নয়নৰ পৰা বঞ্চিত হ’ব লগা হোৱা বুলি বিবৃতিটোত উল্লেখ কৰে সোমনাথ বসুমতাৰীয়ে৷ যুৱ নেতা সোমনাথ বসুমতাৰীয়ে পুনৰ উল্লেখ কৰে যে বিটিএডি এলেকাত নির্বাচনী আচৰণবিধি বলৱৎ হৈ থকাৰ পৰিপ্রেক্ষিতত বিটিএডিৰ বিধায়ক আৰু সাংসদসকলে উন্নয়নৰ কোনো আঁচনি ৰূপায়ণ কৰিব পৰা নাই৷
ইপিনে, আইন–শৃংখলা সুস্থিৰ ৰখাৰ স্বার্থত বিটিএডি এলেকাত বর্তমান বাহাল থকা ৰাজ্যপালৰ শাসন অধিক সম্প্রসাৰিত নকৰিবলৈ যুৱ বিপিএফে বিবৃতিটোৰ জৰিয়তে আহ্বান জনাইছে৷ লগতে কেন্দ্রীয় নির্বাচন আয়োগে বান্ধি দিয়া নীতি–নির্দেশনা অনুসৰি অসম ৰাজ্যিক নির্বাচন আয়োগে যাতে ২৭ অক্টোবৰৰ ভিতৰত বিটিচি পৰিষদীয় নির্বাচন অনুষ্ঠিত কৰে, তাৰ বাবে যুৱ বিপিএফে আহ্বান জনাইছে৷