নিয়মীয়া বাৰ্তা, ১৪ অক্টোবৰঃ ছানৰাইজার্ছ হায়দৰাবাদৰ বিৰুদ্ধে ৰোমাঞ্চকৰ জয়েৰে আত্মবিশ্বাসী হৈ উঠা ৰাজস্থান ৰয়েলছ আজি শক্তিশালী দিল্লী কেপিটেলছৰ সন্মুখীন হ’ব৷ ডুবাই আন্তঃৰাষ্ট্রীয় ক্রিকেট ষ্টেডিয়ামত অনুষ্ঠিত হ’বলগীয়া গুৰুত্বপূর্ণ মেচখনত ষ্টিভেন স্মিথ নেতৃত্বাধীন দলটো জয়ৰ ধাৰা অক্ষুণ্ণ ৰখাৰ লক্ষ্যৰে খেলপথাৰত নামিব৷
একেদৰে শেহতীয়া মেচখনত অপ্রত্যাশিত পৰাজয়ৰ সন্মুখীন হোৱা দিল্লী কেপিটেলছে আজি জয়ৰ ধাৰালৈ উভতি অহাৰ সংকল্প লৈছে৷ চলিত আই পি এলত তিনিখন মেচত জয়ৰ মুখ দেখা ৰাজস্থান ৰয়েলছৰ সন্মুখত এই মুহূর্তত প্রধান সমস্যা হ’ল টপ অর্ডাৰৰ শোচনীয় ব্যর্থতা৷ শ্বাৰজাহত খেলা প্রথম দুখন মেচত ৰানৰ জোৱাৰ তোলা অধিনায়ক স্মিথ আৰু সঞ্জু ছেমছন শেহতীয়া চাৰিখন মেচত একেৰাহে ব্যর্থ হৈছে৷ অ’পেনাৰ জ’ছ বাটলাৰে মুম্বাই ইণ্ডিয়ানছৰ বিৰুদ্ধে ৭০ ৰানৰ আকর্ষণীয় ইনিংছ খেলে যদিও ছানৰাইজার্ছৰ বিৰুদ্ধে পুনৰ ব্যর্থ হয়৷ অৱশ্যে প্রতিভাৱান মিডল অর্ডাৰ বেটছমেন ৰিয়ান পৰাগৰ সাহসী বেটিঙে দলটোৰ আত্মবিশ্বাস বৃদ্ধি কৰিছে৷
শেহতীয়া মেচত মেচ উইনিং ইনিংছ খেলা অসম সন্তান ৰিয়ানৰ ওপৰত আজি পুনৰ ক্রিকেটপ্রেমীৰ দৃষ্টি নিবদ্ধ থাকিব৷ ইফালে, তাৰকা অলৰাউণ্ডাৰ বেন ষ্ট’কছক আজি মিডল অর্ডাৰত বেটিং কৰিবলৈ দিয়াৰ ইংগিত দিছে অধিনায়ক স্মিথে৷
উল্লেখ্য যে ছানৰাইজার্ছৰ বিৰুদ্ধে চলিত আই পি এলত প্রথমখন মেচ খেলা ষ্ট’কছে অ’পেনাৰৰ ৰূপত প্রত্যাশিত সাফল্য অর্জন কৰিব পৰা নাছিল৷
আনহাতে, শেহতীয়া মেচখনত মুম্বাই ইণ্ডিয়ানছৰ হাতত পৰাজয়ৰ সন্মুখীন হোৱা দিল্লী কেপিটেলছে মিডল অর্ডাৰৰ প্রদর্শন উন্নত কৰাৰ লক্ষ্যৰে আজি ৰাজস্থানৰ বিৰুদ্ধে অৱতীর্ণ হ’ব৷ যোৱা সপ্তাহত প্রথম লেগৰ মেচত ৰাজস্থানক ৪৬ ৰানত পৰাস্ত কৰি দলটো মানসিকভাৱে আগবাঢ়ি আছে৷ অধিনায়ক শ্রেয়াছ আয়াৰ, পৃথ্বি শ্ব, শিখৰ ধাৱন আৰু মার্কাছ ষ্টইনিছৰ প্রদর্শনৰ ওপৰত দলটোৰ সাফল্য নির্ভৰ কৰিব৷ ঋষভ পণ্টৰ অনুপস্থিতিত আজিংক্য ৰাহানেই আজি পুনৰ সুযোগ পোৱাৰ সম্ভাৱনা আছে৷
খেলৰ সময়- সন্ধিয়া ৭.৩০ বজা৷