নিয়মীয়া বাৰ্তা, ২০ অক্টোবৰঃ ডিফেণ্ডিং চেম্পিয়ন মুম্বাই ইণ্ডিয়ানছৰ বিৰুদ্ধে ডাবল ছুপাৰ অ’ভাৰত শ্বাসৰুদ্ধকৰ জয় সাব্যস্ত কৰাৰ পিছত কিংছ একাদশ পঞ্জাব আজি পুনৰ খেলপথাৰত নামিব৷
ডুবাইত অনুষ্ঠিত হ’বলগীয়া মেচখনত লোকেশ ৰাহুল নেতৃত্বাধীন দলটোৰ প্রতিদ্বন্দ্বী হ’ব শক্তিশালী দিল্লী কেপিটেলছ৷ চমকপ্রদ প্রদর্শনেৰে প্লে অফৰ স্থান একপ্রকাৰ নিশ্চিত কৰা দিল্লীৰ বিৰুদ্ধে পঞ্জাবে আজি আন এক কঠিন প্রত্যাহ্বানৰ সন্মুখীন হোৱাটো নিশ্চিত৷
অধিনায়ক ৰাহুল, মায়ংক আগৰৱাল আৰু ক্রিছ গেইলৰ সুন্দৰ ফর্মে দলটোক কিছু আত্মবিশ্বাসী কৰি তুলিছে যদিও সহজে জয়ৰ লক্ষ্য অতিক্রম কৰিব নোৱৰাটো দলৰ বাবে প্রধান সমস্যা হৈ দেখা দিছে৷ শেহতীয়া দুখনকৈ মেচত কিংছ একাদশে অতি সহজে জয় সাব্যস্ত কৰাৰ সুযোগ লাভ কৰিও অন্তিম অ’ভাৰলৈ অপেক্ষা কৰিবলগীয়া হৈছিল৷ গ্লেন মেক্সৱেলৰ ধাৰাবাহিক ব্যর্থতাই দলটোৰ মিডল অর্ডাৰৰ সমস্যা দিনকদিনে বৃদ্ধি কৰিছে৷ অৱশ্যে বলিঙত তাৰকা বেগী বলাৰ মহম্মদ ছামিৰ দুর্দান্ত প্রদর্শনে দলৰ আত্মবিশ্বাস বৃদ্ধি কৰিছে৷
ইফালে, শনিবাৰে নিশা চেন্নাই ছুপাৰ কিংছৰ বিৰুদ্ধে জয়েৰে আত্মবিশ্বাসী হৈ থকা দিল্লী কেপিটেলছে প্লে অফৰ স্থান সুনিশ্চিত কৰাৰ লক্ষ্যৰে আজি খেলপথাৰত নামিব৷ অ’পেনাৰ শিখৰ ধাৱনৰ চমকপ্রদ ফর্মে দলটোৰ মনোবল বৃদ্ধি কৰিছে যদিও পৃথ্বি শ্বই সুন্দৰ আৰম্ভণি লাভ কৰিও দীঘলীয়া ইনিংছ খেলাত ব্যর্থ হৈছে৷ ঋষভ পণ্টৰ স্থানত সুযোগ লাভ কৰা আজিংক্য ৰাহানেৰ পৰা দিল্লী কেপিটেলছে কাইলৈ বৃহৎ ইনিংছ আশা কৰিব৷
খেলৰ সময়- সন্ধিয়া ৭.৩০ বজা৷