নিয়মীয়া বাৰ্তা, ২৪ অক্টোবৰঃ বিধানসভা নির্বাচনক লৈ ৰাজনৈতিক দলসমূহৰ মাজত চলি থকা আক্রমণ–প্রতিআক্রম মাজতে নতুন ৰাজনৈতিক দলক লৈ কালি পুনৰ সৰৱ হৈ পৰিল অগপ সভাপতি তথা মন্ত্রী অতুল বৰা৷ নতুনকৈ গঠন হোৱা ৰাজনৈতিক দলক সুলেখা–সুৰেখা চিঞাহীৰ লগত তুলনা কৰাৰ পাছত এইবাৰ নতুন দলক গোপিনী সভাৰ লগত তুলনা কৰিলে অগপৰ সভাপতিজনে৷ শাৰদীয় পূজাৰ মহাসপ্তমীৰ দিনা নতুন দলক কটাক্ষ কৰি অতুল বৰাৰ মন্তব্য– নির্বাচনৰ সময়ত যি হাৰত ৰাজনৈতিক দল গঠন হৈছে, সেয়া গোপিনী সভাৰ দৰে হৈছে৷
নির্বাচনত ভোটাৰেও নাজানিব কিমান দল গঠন হৈছে৷ আনকি নতুন দলৰ নামেই পাহৰি যাব৷ ই ভি এমত কোন কোন ৰাজনৈতিক দলৰ নাম আহিল সেয়াও ভোটাৰে মনত ৰাখিব যে সন্দেহ আছে৷ উল্লেখ্য যে শেহতীয়াকৈ অতুল বৰাই নৱগঠিত ৰাজনৈতিক দলক সুলেখা–সুৰেখা চিঞাহী সৈতে তুলনা কৰাক লৈ যথেষ্ট বিতর্কৰ সৃষ্টি হৈছিল৷ মন্ত্রী বৰাৰ মন্তব্য আছিল– সুলেখা চিঞাহীক নকল কৰি উলিওৱা সুৰেখা চিঞাহী যিদৰে বজাৰত নচলিল, তেনেদৰে অগপৰ নাম লৈ গঠন হোৱা অসম জাতীয় পৰিষদো (অজাপ) সুৰেখা চিঞাহীৰ দৰে৷ যাক ৰাইজে আদৰি নলয়৷
আনহাতে, কংগ্রেছ–এ আই ইউ ডি এফৰ মিত্রতাক লৈও কটাক্ষ কৰি মন্ত্রী অতুল বৰাই কয়– এ আই ইউ ডি এফৰ লগত মিত্রতা কৰাৰ পাছত কংগ্রেছৰ অৱস্থা যে অতি শোচনীয় হ’ব, সেয়া সহজে অনুমেয়৷ মিত্রতা কৰিবলৈ আগবাঢ়ি যোৱা মানেই কংগ্রেছৰ অৱস্থা কি হৈছে, সেয়া স্পষ্ট হৈ পৰিছে৷ অজিত ভূঞাৰ প্রসংগত মন্ত্রীগৰাকীয়ে কয়– অজিত ভূঞা সাংসদ হোৱাৰ পূর্বে ৰাইজৰ যি ধাৰণা আছিল, সেয়া এতিয়া ওলোটা যে হৈছে, সেয়া সকলোৱে দেখিছে৷ বদৰুদ্দিন আজমলক মুখ্যমন্ত্রী পাতিবলৈ ৰাজ্যখনৰ ইমূৰৰ পৰা সিমূৰলৈ ঘূৰি ফুৰাটো অসমৰ ৰাইজে কিভাৱে লৈছে, সেয়া ব্যাখ্যা কৰাৰ প্রয়োজন নাই৷ নতুন দলটোক লৈ কালি ৰাজ্যিক বিজেপিৰ সভাপতি ৰঞ্জিত দাসেও কটাক্ষ কৰে৷
বিজেপিৰ সভাপতিগৰাকীয়ে কয়– অজিত ভূঞাৰ দলৰ নাম এতিয়ালৈকে ভোটাৰে নাজানে৷ আনকি ময়ো নাজানো৷ অজাপৰ নামো সাধাৰণ ভোটাৰে নাজানে৷ আনহাতে, কংগ্রেছে শেহতীয়াকৈ বিজেপিক ৰাৱণৰ সৈতে তুলনা কৰি বিজেপিৰ মুখত ৰাম নাম শোভা নাপায় বুলি কৰা মন্তব্যৰো প্রতিক্রিয়া প্রকাশ আজি ৰঞ্জিত দাসে কয়– কংগ্রেছৰ মুখত ৰাম নাম শোভা নাপায়৷ কিয়নো কংগ্রেছে ৰাৱণৰ দৰে কাম কৰিছে৷ গতিকে বিষ্ণু আৰু ৰামক যাতে অপমান নকৰে, তাৰ বাবে অনুৰোধ কৰিছোঁ৷