নিয়মীয়া বাৰ্তা ১০ ডিচেম্বৰঃ গুৱাহাটী মহানগৰীত বাহৰ পাতি এটা অসাধু চক্রই ড্রাগ্ছৰ ৰমৰমীয়া বেহা চলাই আহিছে৷ মহানগৰ আৰক্ষী আৰু অপৰাধ শাখাই ড্রাগ্ছৰ বিৰুদ্ধে ধাৰাবাহিক অভিযান অব্যাহত ৰাখিছে৷ আৰক্ষীৰ অভিযানত বহুকেইগৰাকী ড্রাগ্ছ সৰবৰাহকাৰী জালত পৰিছে৷ আজি পুনৰ মহানগৰ আৰক্ষী অপৰাধ শাখাই হাতীগাঁৱত অভিযান চলাই ৭৮ গ্রাম হেৰ’ইনসহ দুই সৰবৰাহকাৰীক গ্রেপ্তাৰ কৰিবলৈ সক্ষম হয়৷ হাতীগাঁৱৰ অৰুণোদয় পথৰ এটা বাসগৃহত অভিযান চলাই চুলতান আলী (৩২) আৰু আব্বাছ আলী (২৫) নামৰ ড্রাগ্ছ সৰবৰাহকাৰী দুটাক গ্রেপ্তাৰ কৰে৷ ধৃত সৰবৰাহকাৰী দুটাই দীর্ঘদিন ধৰি মহানগৰীৰ বিভিন্ন স্থানত ড্রাগ্ছৰ বেহা চলাই আহিছে বুলি আৰক্ষীয়ে জানিবলৈ দিছে৷