নিয়মীয়া বাৰ্তা, ১৭ ডিচেম্বৰঃ আৰক্ষী আৰু নিৰাপত্তাৰক্ষীয়ে গিজগিজাই থকা গুৱাহাটী মহানগৰীৰ মালিগাঁৱৰ পৰা কালি সন্ধিয়া ৬ বজাত চাৰিজনীয়া দুর্বৃত্তৰ দলে এগৰাকী আৰ পি এফৰ জোৱানক অপহৰণ কৰা ঘটনাই তীব্র চাঞ্চল্য সৃষ্টি কৰিছে৷ মালিগাঁৱৰ এন এফ ৰে’লৱে মুখ্য কার্যালয়ৰ দ্বাৰত দায়িত্ব পালন কৰি থকা সময়তে এখন চাৰিচকীয়া বাহনত অহা চাৰিজনীয়া দুর্বৃত্তৰ দলটোৱে এন এফ ৰে’লৱেৰ মুখ্য কার্যালয়ৰ সমীপৰ পৰা প্রজেনজিৎ ৰয় নামৰ জোৱানজনক অপহৰণ কৰি নিয়ে৷ নিশা প্রসেনজিতে হোৱাটছএপযোগে পৰিয়ালৰ লোকক অৱগত কৰে৷ঘটনা সন্দর্ভত পৰিয়ালৰ লোক আৰু আৰ পি এফৰ শীর্ষ বিষয়াই জালুকবাৰী থানাত এজাহাৰ দাখিল কৰে৷ উক্ত এজাহাৰৰ ভিত্তিত এটা গোচৰ ৰুজু কৰি তদন্ত অব্যাহত ৰাখিছে যদিও এতিয়ালৈকে প্রসেনজিৎ আৰু অপহৰণকাৰীৰ কোনো সন্ধান উলিয়াব পৰা নাই৷