নিয়মীয়া বাৰ্তা, ২০ ডিচেম্বৰঃ যোৱা ১১ ডিচেম্বৰৰ পৰা ৰাজ্যত বন্ধ হৈ থকা ইণ্টাৰনেট সেৱা আজি পুৱা ৯ বজাৰ পৰা পুনৰ আৰম্ভ কৰা হৈছে ৷
ব্রডবেণ্ড ইণ্টাৰনেট সেৱা ইতিমধ্যে মুকলি কৰাৰ পাছত আজিৰে পৰা ম’বাইল ইণ্টাৰনেটো উপলব্ধ হ’ব ৷
উল্লেখ্য যে বৃহস্পতিবাৰে গুৱাহাটী উচ্চ ন্যায়ালয়ে সন্ধিয়া ৫ বজাৰ পৰা ইণ্টাৰনেট সেৱা মুকলি কৰি দিবলৈ চৰকাৰক নির্দেশ দিছিল ৷ অৱশ্যে সন্ধিয়া পর্যন্ত ইণ্টাৰনেট সেৱা পুনৰ আৰম্ভ কৰা নহ’ল ৷ ইয়াৰ পাছতে মন্ত্রী ড০ হিমন্ত বিশ্ব শর্মাই শুকুৰবাৰৰ পৰা ইণ্টাৰনেট সেৱা পুনৰ আৰম্ভ হ’ব বুলি জানিবলৈ দিয়ে ৷
লক্ষণীয় যে ইণ্টাৰনেট বন্ধ হোৱাৰ ফলত ব্যাহত হৈ পৰিছিল বহু কার্যালয়ৰ কাম–কাজ ৷ বিশেষকৈ বিভিন্ন কেব সেৱাসমূহ সম্পূর্ণৰূপে অচল হৈ পৰে ৷ ইয়াৰ বিৰুদ্ধে কেবচালকসকলে প্রতিবাদো সাব্যস্ত কৰিছে ৷
স্বাভাৱিক জীৱনযাত্রাত ইণ্টাৰনেট সেৱা বন্ধৰ প্রভাৱৰ প্রতি লক্ষ্য ৰাখি অধিবক্তা বনশ্রী গগৈ, জ্যেষ্ঠ সাংবাদিক অজিত কুমাৰ ভূঞা আৰু দেৱকন্যা দলেই গুৱাহাটী উচ্চ ন্যায়ালয়ত তিনিখন ৰাজহুৱা স্বার্থজড়িত আবেদন দাখিল কৰে ৷ শুনানিৰ সময়ত ৰাজ্য চৰকাৰে এখন শপতনামাযোগে অৱগত কৰে যে চোৰাংচোৱা সংস্থাৰ তথ্যৰ ভিত্তিত ম’বাইল ইণ্টাৰনেট সেৱা বন্ধ কৰি ৰখা হৈছে ৷ কিন্তু বর্তমান ৰাজ্যলৈ ঘূৰি অহা স্বাভাৱিক পৰিস্থিতিৰ প্রতি লক্ষ্য ৰাখি গুৱাহাটী উচ্চ ন্যায়ালয়ে ইণ্টাৰনেট সেৱা পুনৰ সক্রিয় কৰিবলৈ নির্দেশ দিয়ে ৷