নিয়মীয়া বার্তা, ২৪ জানুৱাৰীঃ নগাঁৱৰ জলাহ গাঁৱত ২০১১ চনতে প্রতিষ্ঠা লাভ কৰা ৰূপান্তৰে অসমৰ নাট্য, সাহিত্য, সমাজ জীৱনলৈ নিৰলসভাৱে সেৱা আগবঢ়াই অহা একোজনকৈ বিশেষ ব্যক্তিক ৰূপান্তৰ বঁটা প্রদান কৰি আহিছে৷ এইবেলি প্রবীণ কৌতুক অভিনেতা ৰামেশ্বৰ হাজৰিকাক ৰূপান্তৰ শিল্পী বঁটা প্রদান কৰা হয়৷ ভাষণ প্রসংগত নাট্যজীৱনৰ বহু অভিজ্ঞতা প্রকাশ কৰে ৰামেশ্বৰ হাজৰিকাই৷
যুৱ লেখিকা শর্মিষ্ঠা প্রীতমক প্রয়াত কোকিল চক্রৱর্তী অনুপ্রেৰণা বঁটা প্রদান কৰা হয়৷ ৰূপান্তৰ সমাজহিতৈষী বঁটা প্রদান কৰা হয় বিশিষ্ট সমাজকর্মী দেৱেন্দ্র সিং শ্বেহমীলৈ৷ সাহিত্য বঁটা লাভ কৰে লেখক কেশৱ বৰাই৷
ইফালে, নতুন প্রজন্মক সাহিত্যৰ প্রতি আকর্ষিত কৰিবলৈ ‘বত্তৃণতা শুনক আৰু লাভ কৰক পুৰস্কাৰ’ এক ব্যতিক্রমী প্রচেষ্টাও হাতত লয় ৰূপান্তৰে৷ য’ত নগাঁৱৰ এডিপি কলেজ, খাগৰিজান কলেজ আৰু নগাঁও মহাবিদ্যালয়ৰ ছাত্র–ছাত্রীয়ে অংশ লয়৷ নগাঁৱৰ বহুকেইগৰাকী বৰেণ্য ব্যক্তি, সাংবাদিকৰ উপস্থিতিত অতি গাম্ভীর্যপূর্ণ অনুষ্ঠানটিত শিল্পী গভীৰ নাথে গীত পৰিৱেশন কৰাৰ লগতে ৰূপান্তৰৰ দুই কণমানি শিল্পীয়ে নৃত্য পৰিৱেশন কৰে৷