অবাঞ্ছিত অভিলেখ দেশত প্রথমবাৰৰ বাবে পেট্র’লৰ মূল্য ১০০ টকা অতিক্রম

নিয়মীয়া বাৰ্তা ১৮ ফেব্ৰুৱাৰীঃ পেট্র’লৰ মূল্যবৃদ্ধিয়ে অনাকাংক্ষিত অভিলেখ গঢ়িলে৷ দেশত প্রথমবাৰৰ বাবে প্রতিলিটাৰ পেট্র’লৰ মূল্যই চেঞ্চুৰী মাৰিলে৷ অর্থাৎ প্রতিলিটাৰ পেট্র’লৰ মূল্য ১০০ টকা অতিক্রম কৰিলে৷ বিগত ৯ দিন ধৰি পেট্র’লৰ মূল্য ধাৰাবাহিক বৃদ্ধি পাই আহিছে৷ দেশৰ প্রতিখন ৰাজ্যতেই প্রতিদিনে পইচা পইচাকৈ ইন্ধনৰ বিশেষকৈ পেট্র’ল আৰু ডিজেলৰ মূল্য বৃদ্ধি হৈ আছে৷ ৰাজহুৱা খণ্ডৰ ইন্ধনৰ পাইকাৰী কোম্পানীয়ে নির্ধাৰণ কৰি থকা পেট্র’ল আৰু ডিজেলৰ মূল্য আজি পুনৰ ২৫ পইচাকৈ বৃদ্ধি পোৱাত কেইবাখনো ৰাজ্যত প্রতিলিটাৰ পেট্র’লৰ মূল্যই ১০০ টকা অতিক্রম কৰিছে৷ প্রতিলিটাৰ পেট্র’লত ১০০ টকা অতিক্রম কৰা ৰাজ্যকেইখন হৈছে– ৰাজস্থান, মধ্যপ্রদেশ আৰু মহাৰাষ্ট্র৷ ৰাজস্থানৰ শ্রীগংনগৰত আজি প্রতিলিটাৰ পেট্র’লৰ মূল্য ১০০.১৩ টকা৷ চহৰখনত প্রতিলিটাৰ ডিজেলৰ মূল্য ৯২.২৩ টকা৷ উল্লেখ্য যে ইন্ধনৰ মূল্য ৰাজ্যসমূহে প্রয়োগ কৰা স্থানীয় কৰ বিশেষকৈ ভেট আৰু পৰিবহণ মাচুলৰ ওপৰত নির্ভৰ কৰে৷ দেশৰ ভিতৰতে কংগ্রেছশাসিত ৰাজস্থানত সর্বাধিক ভেট আৰোপ কৰা হয়৷

মন কৰিবলগীয়া যে ৰাজস্থানে বিগত মাহত পেট্র’ল আৰু ডিজেলৰ ওপৰত ভেট ২ শতাংশ কর্তন কৰিছিল যদিও দেশৰ ইতিহাসত ৰাজস্থানত প্রথমবাৰৰ বাবে প্রতিলিটাৰ পেট্র’লৰ মূল্যই শ টকা অতিক্রম কৰিছে৷ আনপিনে শিৱসেনা–কংগ্রেছ–এন্ চি পিৰ মিত্রজোঁটৰ চৰকাৰ থকা মহাৰাষ্ট্রতো কেইবাটাও অঞ্চলত প্রতিলিটাৰ পেট্র’লৰ মূল্যই ১০০ টকা অতিক্রম কৰিছে৷ তেনেদৰে বিজেপিশাসিত মধ্যপ্রদেশৰ কেইখনমান চহৰত পেট্র’লৰ মূল্যই ১০০ টকা স্পর্শ কৰিছে৷ দেশৰ ৰাজধানী দিল্লীত প্রতিলিটাৰ পেট্র’লৰ মূল্য ৮৯.৫৪ টকা আৰু ডিজেলৰ মূল্য ৭৯.৯৫ টকা৷ তেনেদৰে মুম্বাইত পেট্র’ল ৯৬ আৰু ডিজেলৰ ৮৬.৯৮ টকা৷ উনুকিয়াব লাগিব যে কেন্দ্র আৰু ৰাজ্য চৰকাৰে পেট্র’লত ৬০ শতাংশ কৰ আৰোপ কৰাৰ বিপৰীতে প্রতিলিটাৰ ডিজেলত ৫৪ শতাংশতকৈ অধিক কৰ সংগ্রহ কৰি আছে৷ কেন্দ্রীয় চৰকাৰে প্রতিলিটাৰ পেট্র’লত আবকাৰী শুল্ক ৩২.৯০ টকা আৰু প্রতিলিটাৰ ডিজেলত ৩১.৮০ টকা সংগ্রহ কৰে৷ ২০২০ চনৰ মার্চৰ মাজভাগৰ পৰা আৰম্ভ হৈ এতিয়ালৈকে প্রতিলিটাৰ পেট্র’লত ১৯.৯৫ টকা আৰু প্রতিলিটাৰ ডিজেলত ১৭.৬৬ টকাকৈ বৃদ্ধি হৈছে৷ আন্তর্জাতিক বজাৰত খাৰুৱা তেলৰ মূল্য বৃদ্ধি কিম্বা হ্রাস পোৱাক লৈ কেন্দ্রীয় চৰকাৰে কৰৰ হাৰ বৃদ্ধি কৰে৷