নিয়মীয়া বাৰ্তা, ১১ এপ্ৰিলঃ মথাউৰি নির্মাণকালৰে পৰা কোনোদিনে এচপৰা মাটিও নপৰা হাজো বিধানসভা সমষ্টিৰ মাজেৰে বৈ যোৱা পুঠিমাৰী নৈৰ দুয়োপাৰৰ মথাউৰি যোৱা ২০২০ বর্ষৰ মার্চত পুনৰ নির্মাণত অনুমোদন দিয়া হয়৷ কিন্তু জলসম্পদ বিভাগৰ হাজো উপ–সংমণ্ডলৰ বিষয়া আৰু ঠিকাদাৰৰ চূডান্ত হেমাহিত সর্বসাধাৰণ ৰাইজে যমৰ–যাতনা ভুগি থাকিবলগীয়া হোৱাৰ গুৰুতৰ অভিযোগ উত্থাপন হৈছে৷
উল্লেখ্য যে যোৱাবর্ষত আঠগাঁও, সোণাপুৰ, ৩ নং মনাহকুছি আৰু কচুৱাৰবডীত চাৰিটাকৈ স্থানত পুঠিমাৰী নৈয়ে মথাউৰি ছিঙি সমগ্র হাজো সমষ্টি বুৰাই পেলাইছিল আৰু সমগ্র হাজোবাসীয়ে দুর্বিষহ জীৱন কটাবলগীয়াত পৰিছিল৷ তাৰেই পৰিপ্রেক্ষিতত যোৱাটো বর্ষত নৈখনৰ দুয়োপাৰৰ জৰাজীর্ণ মথাউৰি দুছোৱা পুনৰ নির্মাণত আবণ্টন দিয়া হয়৷ সেইমর্মে ঠিকাদাৰৰ দ্বাৰা মথাউৰি দুছোৱা পুনৰ নির্মাণৰ কাম যোৱা ২০২০ বর্ষৰ মার্চ মাহত শুভাৰম্ভ কৰে যদিও পুনৰ বাৰিষা আহিল৷ কিন্তু আজিও মথাউৰি দুছোৱাৰ পুনৰ নির্মাণৰ কাম আধৰুৱা হৈ আছে৷ একাংশ অঞ্চলত মাটি পেলাইছে যদিও ৰোলাৰ, ড্রেছিং নকৰা আৰু যাতায়াতৰ উপযোগীকৈ ছেণ্ডগ্রেভেলৰ কাম হৈ নুঠাত ফল ভুগিবলগীয়াত পৰিছে সর্বসাধাৰণ ৰাইজে৷ সম্প্রতি এক ধূলিময় পৰিৱেশ আৰু বৰষুণ দিলে বোকাময় হৈ পৰে মথাউৰি৷ মথাউৰি যাতায়াতৰ বাবে অনুপযোগী হৈ পৰে৷