ক’ভিডৰ ৬১৭ প্রকৰণৰ বিৰুদ্ধে সফল ক’ভাক্সিন

নিয়মীয়া বাৰ্তা ২৯ এপ্ৰিলঃ ভাৰতে প্রস্তুত কৰা ক’ভিড–১৯ ভেকচিন ক’ভাক্সিন মাৰাত্মক ভাইৰাছবিধৰ ৬১৭টা ভিন্ন প্রকৰণৰ বিৰুদ্ধে ফলপ্রসূ হিচাপে চিহ্ণিত হৈছে৷ উল্লেখনীয় যে ভাৰত বায়’টেক, নেচনেল ইনষ্টিটিউট অৱ ভাইৰ’ল’জী আৰু ভাৰতীয় চিকিৎসা গৱেষণা পৰিষদে (আইচিএমআৰ) এই ক’ভাক্সিন ভেকচিন যৌথভাৱে প্রস্তুত কৰিছে৷ তিনি জানুৱাৰীত এই ভেকচিনবিধ ভাৰতত জৰুৰী ব্যৱহাৰৰ বাবে অনুমোদন জনোৱা হৈছিল৷ হোৱাইট হাউছৰ মুখ্য চিকিৎসা উপদেষ্টা তথা আমেৰিকাৰ শীর্ষ মহামাৰী বিশেষজ্ঞ ডাঃ এণ্টনী ফাউচিয়ে ভাৰতৰ এই ভেকচিনবিধৰ সফলতাৰ কথা শেহতীয়াকৈ সদৰী কৰিছে৷

কালি হোৱাইট হাউছত সাংবাদিকৰ মুখামুখি হৈ বিশেষজ্ঞ চিকিৎসকগৰাকীয়ে কয় যে ইতিমধ্যে ক’ভাক্সিন ভেকচিন ক’ভিডৰ ভিন্ন প্রকৰণৰ বিৰুদ্ধে সফল বুলি প্রমাণিত হৈছে৷ গতিকে ডাঃ ফাউচিৰ মতে ক’ভাক্সিন ভেকচিন ভাৰতে অধিকসংখ্যক লোকক প্রদান কৰাটো জৰুৰী৷ নিউয়র্ক টাইমছৰ প্রতিবেদন অনুসৰি ক’ভাক্সিনে মহামাৰী প্রতিৰোধৰ ক্ষমতা বৃদ্ধি কৰে৷

উল্লেখনীয় যে শৰীৰত এণ্টিব’ডী তৈয়াৰ কৰাৰ ক্ষেত্রত এই ভেকচিনবিধৰ গুৰুত্বপূর্ণ ভূমিকা থকা বুলিও কাকতখনৰ প্রতিবেদনত প্রকাশ পাইছে৷ স্মর্তব্য যে পূর্বে ক্লিনিকেল পৰীক্ষাত ক’ভাক্সিন ভেকচিন ৭৮ শতাংশ ফলপ্রসূ বুলি চিহ্ণিত কৰা হৈছিল৷ ইফালে, ক’ভিড যুঁজত ভেকচিন প্রস্তুতৰ ক্ষেত্রত আমেৰিকাৰ বিশেষজ্ঞ চিকিৎসকলে ভাৰতক সহায় কৰাৰ প্রতিশ্রুতিও দিছে৷ ফাউচিৰ বক্তব্যৰ পাছতে ক’ভাক্সিন ভেকচিনৰ বিশ্বাসযোগ্যতা বিশ্বজুৰি বৃদ্ধি পোৱাৰ সম্ভাৱনা আছে৷