নিয়মীয়া বাৰ্তা, ২২ জুনঃ ক’ভিড নীতি–নিয়মসমূহ অনুকৰণ নকৰিলে দ্বিতীয় ঢৌৰ দৰে ক’ৰোনাৰ তৃতীয় ঢৌ ৰাজ্যত প্রাদুর্ভাৱ ঘটাৰ আশংকা ব্যক্ত কৰিলে মুখ্যমন্ত্রী ড০ হিমন্ত বিশ্ব শর্মাই৷ সোমবাৰে ধেমাজি জিলা উপায়ুক্তৰ সভাকক্ষত এখন সংবাদ মেল সম্বোধন কৰি এই আশংকা ব্যক্ত কৰি তেওঁ কয়– ক’ৰোনাৰ প্রথম ঢৌৰ পাছত নীতি–নিয়মসমূহ অনুকৰণ নকৰাৰ বাবেই দ্বিতীয় ঢৌ আহিল ৰাজ্যখনত৷ দ্বিতীয় ঢৌ লাহে লাহে শেষ হোৱাৰ পাছত পৰিৱেশ কিছু স্বাভাৱিক হোৱাৰ পাছতেই পুনৰ নীতি–নিয়মসমূহ অনুকৰণ কৰা বাদ দিলে কাৰোবাৰ পৰা ই সংক্রমণ বিয়পিব পাৰে৷
কিয়নো পৰিৱেশ স্বাভাৱিক হ’লে অফিচ–কাছাৰী স্বাভাৱিক হ’ব৷ ফলত কোনো এজনৰ পৰাই সংক্রমণ হোৱাৰ সম্ভাৱনা অধিক৷ অৱশ্যে যিসকলে ভেকচিন লৈছে, তেওঁলোক আক্রান্ত নহ’ব৷ কিন্তু ১৮ বছৰৰ তলৰসকল ক’ৰোনাত আক্রান্ত হ’ব৷
অৱশ্যে এইক্ষেত্রত এটা ইতিবাচক দিশ হ’ল আমাৰ শিশুসকলৰ স্বাভাৱিক প্রতিৰোধী ক্ষমতা অধিক৷ ক’ভিডত সেইসকল লোকৰ মৃত্যু হৈছে, যিসকলৰ ডায়েবেটিছ বা অন্য ৰোগ আছে৷ কিন্তু ১৮ বছৰৰ তলৰ শিশু–কিশোৰৰ এই ধৰণৰ ৰোগ নাথাকে৷ দ্বিতীয়তে তেওঁলোকে বহু প্রতিষেধক লৈ থাকে কাৰণে এটা স্বাভাৱিক প্রতিৰোধী ক্ষমতা লাভ কৰে৷ তৃতীয়তে আক্রান্ত হ’লেও তেওঁলোকে শ্বাস–প্রশ্বাসৰ সমস্যাত নপৰে৷ ডাঙৰৰ আচাৰ–ব্যৱহাৰ আৰু শিশুৰ স্বাভাৱিক প্রতিৰোধী ক্ষমতাই এইক্ষেত্রত সহায়ক হ’ব৷
তদুপৰি ভৱিষ্যতে যদি ১২ বছৰলৈকে শিশুৰ প্রতিৰোধী ভেকচিন আহে, তেন্তে এই সকলো দিশ সামৰি হয়তো ভৱিষ্যতে ক’ভিডৰ লগত যুঁজিব পাৰিম৷ আজি মুখ্যমন্ত্রীয়ে ধেমাজি জিলাত আগন্তুক ৭৫ দিনৰ ভিতৰত ভেকচিন প্রদান সম্পূর্ণ কৰাৰ লক্ষ্য লোৱা বুলিও জানিবলৈ দিয়ে৷ ইয়াৰ পূর্বে মুখ্যমন্ত্রীয়ে সোমবাৰে জিলাখনৰ বান পৰিস্থিতি সন্দর্ভত বিস্তৃত আলোচনা কৰে৷
মুখ্যমন্ত্রীয়ে জিলা প্রশাসনক অৰুণাচলৰ পৰা নামনিলৈ নামি অহা নদীসমূহৰ তথ্য সংগ্রহ কৰাৰ লগতে বৰষুণৰ তথ্য আহৰণৰ নির্দেশ দিয়ে৷ যাতে ইয়াৰ ওপৰত ভিত্তি কৰি প্রশাসনে বান সাহায্য আৰু পুনৰ সংস্থাপনৰ ব্যৱস্থা ক্ষিপ্র কৰিব পাৰে৷ মুখ্যমন্ত্রীয়ে জিলা প্রশাসনক বানপ্রৱণ এলেকাৰ পথসমূহৰ উপযুক্ত মানচিত্র প্রস্তুত কৰাৰ বাবে আজি নির্দেশ দিয়ে৷