নিয়মীয়া বাৰ্তা ৩০ জুলাইঃ বিশ্বত ক’ভিড মহামাৰীয়ে পুনৰ ভয়ংকৰ ৰূপ ধাৰণ কৰিছে৷ বিশ্ব স্বাস্থ্য সংস্থাই শেহতীয়াকৈ প্রতিবেদনত সদৰী কৰিছে এই তথ্য৷ ১৯ৰ পৰা ২৫ জুলাইলৈকে সমগ্র বিশ্বজুৰি ক’ভিড–১৯ত ৬৯ হাজাৰতকৈ অধিক লোকৰ মৃত্যু হৈছে৷ এয়া এক আশংকাজনক বার্তা বুলি অভিহিত কৰিছে বিশ্ব স্বাস্থ্য সংস্থাই৷ সপ্তাহটোত পূর্বৰ তুলনাত ২১ শতাংশ অধিক লোকৰ মৃত্যু হৈছে৷ নতুনকৈ মৃত্যু হোৱা গৰিষ্ঠসংখ্যক লোক হৈছে আমেৰিকা আৰু দক্ষিণ–পূব এছিয়া অঞ্চলৰ৷ বিশ্ব স্বাস্থ্য সংস্থাই সদৰী কৰা অনুসৰি সপ্তাহটোত সমগ্র পৃথিৱীত ক’ভিড–১৯ মহামাৰীত নতুনকৈ আক্রান্ত হৈছে ৩৮ লাখ লোক৷
অর্থাৎ মহামাৰীত আক্রান্ত লোকৰ সংখ্যা আভাৱনীয়ভাৱে বৃদ্ধি পাইছে৷ সংস্থাটোৰ প্রতিবেদনত এই সতর্কবাণী কৰা হৈছে যে ক’ভিড মহামাৰীয়ে এনেদৰে পৃথিৱীজুৰি বিস্তাৰ ঘটালে ভৱিষ্যতে পৰিস্থিতি অধিক ভয়াৱহ হৈ পৰিব৷ বিভিন্ন দেশত ক’ভিড প্রট’কল শিথিল কৰি দিয়া হৈছে৷ মহামাৰী প্রতিৰোধৰ ক্ষেত্রত থকা নিষেধাজ্ঞা উঠাই দিয়া হৈছে৷ এই কার্যৰ ফলত মহামাৰীয়ে পুনৰ পৃথিৱীত সংহাৰ সৃষ্টি কৰাৰ সম্ভাৱনা আছে বুলি সতর্কবাণী কৰিছে সংস্থাটোৱে৷