নিয়মীয়া বাৰ্তা ১৫ ছেপ্টেম্বৰঃ চৰকাৰী কর্মচাৰীসকলৰ বাবে সুখবৰ কঢ়িয়াই আনিছে মুখ্যমন্ত্রী ড০ হিমন্ত বিশ্ব শর্মাই৷ অৱসৰ গ্রহণৰ দিনাই পেন্সনৰ কাগজ–নথি কর্মচাৰীগৰাকীৰ হাতত তুলি দিয়াৰ বাবে বিশেষ পদক্ষেপ গ্রহণ কৰিছে৷ মুখ্যমন্ত্রী ড০ শর্মাই মঙলবাৰে মহানগৰীৰ হাউছফেডস্থিত পেন্সন সঞ্চালকালয়ত উপস্থিত হৈ এখন পর্যালোচনা বৈঠকত মিলিত হয় আৰু পেন্সনৰ বিষয়সমূহৰ বিলম্বতা আৰু মীমাংসাৰ দিশসমূহ পর্যালোচনা কৰে৷ অৱসৰ গ্রহণৰ দিনটোতেই পেন্সন লাভ কৰাটো যাতে কর্মচাৰীসকলৰ বাবে নিশ্চিত কৰিব পৰা যায়, তাৰ বাবে কৃতজ্ঞতা শীর্ষক প’র্টেল আৰু এমট্রনৰ পেন্সন প’র্টেল যুক্ত কৰি ২০২২ চনৰ জানুৱাৰীৰ ভিতৰত কোষাগাৰ বিষয়াসকলৰ কার্যালয়ৰ সৈতে পেন্সন সঞ্চালকালয়ৰ ডিজিটেল লিংক স্থাপনৰ ক্ষেত্রত পদক্ষেপ ল’বৰ বাবে মুখ্যমন্ত্রী ড০ শর্মাই এমট্রনক নির্দেশ দিয়ে৷
এই পদক্ষেপে পেন্সন প্রদান পদ্ধতিটো কাগজবিহীন আৰু ক্ষিপ্র কৰি তুলিব৷ মুখ্যমন্ত্রী ড০ শর্মাই আৰু কয় যে এমট্রনক প্রত্যেক কার্যালয়ৰ ডিডিঅ’সকললৈ একোটাকৈ স্কেনাৰ যোগান ধৰাৰ বাবে নির্দেশ দিছে৷ যাৰ জৰিয়তে এগৰাকী অপাৰেটৰে পেন্সনাৰগৰাকীৰ সকলো নথি আপলোড কৰিব৷ পেন্সন সঞ্চালকালয়ে এই নথিসমূহ ডাউনলোড কৰিব আৰু ডিজিটেল স্বাক্ষৰৰ পিছত সেয়া নিষ্পত্তি কৰিব৷ এই পদ্ধতিয়ে কায়িক নথিৰ প্রয়োজনীয়তা নোহোৱা কৰিব আৰু পেন্সন প্রদানৰ দিশটো ক্ষিপ্র কৰি তুলিব৷ অৱসৰ গ্রহণৰ দিনাখনেই এগৰাকী কর্মচাৰীক পেন্সন প্রদান কৰাৰ লক্ষ্যৰে এক পদ্ধতি উপলব্ধ কৰাৰ বাবে বর্তমানৰ চৰকাৰে পেন্সন সঞ্চালকালয়ৰ ছফ্টৱেৰটো আপগ্রেড কৰিব বিচাৰিছে৷
এইক্ষেত্রত তেওঁ কর্মচাৰীসকলকো অৱসৰ গ্রহণৰ ছমাহ আগেয়ে পেন্সনৰ কাগজ–পাতি কৃতজ্ঞতা প’র্টেলত আপলোড কৰাৰ আহ্বান জনায়৷ বর্তমান প্রতিমাহে এহাজাৰটা পেন্সনৰ কেছ নিষ্পত্তি হোৱাৰ কথা উল্লেখ কৰি মুখ্যমন্ত্রী ড০ শর্মাই কয় যে ইয়াৰ বাবে তিনি মাহ সময়ৰ প্রয়োজন হয়৷ বর্তমান পেন্সন সঞ্চালকালয়ত তিনি হাজাৰটা কেছ পৰি আছে৷ অহা অক্টোবৰৰ পৰা প্রতিমাহে ১৫০০টা কেছ নিষ্পত্তি কৰাৰ লক্ষ্য স্থিৰ কৰা হৈছে৷ সেইদৰে যোৱা বছৰ ৰাজ্য চৰকাৰে যিসকল অৱসৰপ্রাপ্ত কর্মচাৰীৰ অবিবাহিত ছোৱালী আছে, তেওঁলোককো পৰিয়াল পেন্সন দিয়াৰ ব্যৱস্থা কৰাৰ বিষয়ে উল্লেখ কৰি মুখ্যমন্ত্রী ড০ শর্মাই কয় যে এতিয়ালৈ ২৭২গৰাকী অবিবাহিত ছোৱালীক পৰিয়াল পেন্সন দিয়া হৈছে৷ একেদৰে চাকৰি কালতে মৃত্যুবৰণ কৰা ২,১১৫জন লোকৰ পৰিয়াললৈও এতিয়ালৈ অনুকম্পামূলক পৰিয়াল পেন্সন দিয়া হৈছে৷