নিয়মীয়া বাৰ্তা ২০ ছেপ্টেম্বৰঃ আপুনি বাৰু যিকোনো ফল খোৱাৰ পিছত পানী খায় নেকি? যদিহে খায়, তেন্তে আজিৰে পৰা এই বদ–ভ্যাস ত্যাগ কৰক৷ কিয়নো ইয়াৰ কাৰণে পেটৰ বিষ হ’ব পাৰে৷ কেতিয়াবা ফল খোৱাৰ পিছত পানী খোৱাৰ কাৰণে পেটটো ফুলি থকা যেন অনুভৱ হয়৷ পাকস্থলীৰ পৰা মুখেৰে মৰা উগাৰৰ যোগেৰে অথবা অন্ত্রৰ পৰা গুহ্যদ্বাৰেৰে গেছ হৈ ওলাই যাব পাৰে৷ আয়ুর্বেদ শাস্ত্র মতে, আমি যিকোনো ফল গ্রহণ কৰাৰ পিছত পানী খাব নালাগে৷ প্রকৃততে যিকোনো আহাৰ গ্রহণ কৰাৰ ঠিক আগতে বা পিছত পানী খোৱা অনুচিত৷ কিয়নো পেটত থকা এচিডৰ খাদ্যৰ ওপৰত কৰা ক্রিয়া পানীয়ে বিনষ্ট কৰে৷ ফলত হজমত সমস্যা হয়৷
গৰমৰ দিনত পানী যথেষ্ট পৰিমাণে খোৱা হয়৷ লগতে ফলৰ ৰসো গ্রহণ কৰা হয়৷ কিন্তু গোটা ফল খাই পানী খোৱা অনুচিত৷ প্রতিটো ফলতে যথেষ্ট পৰিমাণৰ চেনি থাকে৷ যাক মধু শর্কৰা বা ফল শর্কৰা বোলা হয়৷ কেঁচা ফলতকৈ এই শর্কৰা পকা ফলত বেছিকৈ থাকে৷ ফলত থকা আন এটা উপাদান হৈছে ইষ্ট৷ ই পেটত থকা এচিড তৰল কৰে৷ ফলত পেটৰ ভিতৰত কার্বন–ডাই–ক্সাইড উৎপন্ন হৈ গেছৰ সৃষ্টি কৰে৷ সেয়ে যিকোনো আহাৰ গ্রহণ কৰাৰ এঘণ্টা পিছতহে পানী খাব লাগে৷ আয়ুর্বেদ চিকিৎসাত এই নিয়ম পালন কৰাত সর্বাধিক গুৰুত্ব দিছে৷
আয়ুর্বেদত হজম কৰা ক্ষমতাক ‘অগ্ণি’ বুলি কোৱা হয়৷ পানীয়ে এই অগ্ণি ক্ষমতা প্রশমিত কৰে৷ বিশেষকৈ কল খোৱাৰ পিছত কোনো কাৰণতে পানী খাব নালাগে৷ কিয়নো বদহজম হোৱাৰ বহু সম্ভাৱনা আছে৷ অত্যন্ত খাব লগা হ’লে ২০ মিনিটৰ পিছতহে পানী খাব লাগে৷ পানীয়ে আমাৰ পেটৰ পি এইচৰ লেভেলৰ ক্ষতি কৰে৷ কিয়নো মানুহৰ পেটত গেছ হোৱাৰ বিভিন্ন কাৰণৰ ভিতৰত এটা মুখ্য কাৰণ হৈছে– পেটৰ হজমৰ এচিডৰ লেভেল কম হোৱাটো৷ পানীয়ে খাদ্য হজম কৰাত ব্যাঘাত জন্মায়৷ আনহাতে, খাদ্যৰ পৰা পাব লগা খাদ্যপ্রাণো সঠিকভাৱে শৰীৰে লাভ নকৰে৷ যিহেতু আপুনি খাদ্যগ্রহণ কৰিছে আপোনাৰ শৰীৰৰ বাবে, সেয়ে এনে অভ্যাস পৰিত্যাগ কৰক– যিয়ে শৰীৰৰ ক্ষতি কৰে৷