নিয়মীয়া বার্তা, ১২ মার্চঃ এগৰাকী অসমীয়া যুৱতীৰ পাণিগ্রহণৰ বাবে সুদূৰ নাইজেৰিয়াৰ এজন খ্রীষ্টিয়ান যুৱকে বুধবাৰে কলিয়াপানীস্থিত শ্রীশ্রী আউনীআটী সত্রৰ শিষ্যত্ব গ্রহণ কৰিলে ৷ নাইজেৰিয়াৰ যুৱক ডেভিড জ’নে বুধবাৰে অসমৰ চাৰি ৰাজ সত্রৰ অন্যতম আউনীআটি সত্রৰ শিষ্যত্ব গ্রহণ কৰি হিন্দু ধর্মত দীক্ষিত হ’ল ৷ জানিব পৰা মতে, দিল্লীৰ এটা বহুজাতিক কোম্পানীত কর্মৰত নাইজেৰিয়ান যুৱক ডেভিড জ’নৰ লগত তিনি বছৰৰ পূর্বে প্রেমৰ সম্পর্ক হৈছিল তিতাবৰৰ যুৱতী সবিতাবৰাৰ ৷ দীর্ঘদিনীয়া প্রেমৰ অন্তত বিবাহ পাশত আবদ্ধ হোৱাৰ সিদ্ধান্ত লৈছিল দুয়ো ৷ এই সিদ্ধান্ত তিতাবৰৰ যুৱতী সবিতাই ঘৰত অৱগত কৰাৰ পাছত গাঁৱৰ ৰাইজে জ’নক সত্রীয়া সংস্কৃতি আঁকোৱালি লৈ মাজুলী সত্রত শৰণ ল’বলৈ পৰামর্শ দিয়ে ৷ ডেভিড জ’নে এই কথা মানি লৈ মাজুলী যোৱাৰ প্রস্তুতি চলাই যদিও বর্তমান ক’ৰোনা ভাইৰাছৰ বাবে মাজুলীলৈ গৈ শৰণ লোৱা সম্ভৱ ন’হল ৷ ফলত বুধবাৰে প্রেয়সীসহ ডেভিডে যোৰহাট জিলাৰ টীয়ক কলিয়াপানীস্থিত শ্রীশ্রী আউনীআটী শাখা সত্রত গোবিন্দ মহাপ্রভূৰ ওচৰত শৰণ ল’লে ৷ সম্পূর্ণ অসমীয়া সাজ–পোছাক পৰিধান কৰি ডেভিদে শৰণ লয় ৷ ভাষা–সংস্কৃতি সুকীয়া হ’লেও আজি কেৱল প্রেমৰ বাবেই অসমীয়া পৰম্পৰা আৰু সংস্কৃতি আঁকোৱালি লৈ সুখী বুলি মন্তব্য কৰিলে বিদেশী যুৱকগৰাকীয়ে ৷ আনহাতে সত্রাধিকাৰ ড০ পীতাম্বৰ দেৱগোস্বামীয়েও ডেভিড জ’নক শৰণ দি আনন্দিত ৷