নিয়মীয়া বাৰ্তা, ২০ ডিচেম্বৰঃ ‘কা’ বিৰোধী আন্দোলনে সমগ্ৰ ৰাজ্য উত্তাল কৰি ৰখাৰ সময়তে প্ৰতিবাদৰ নামত একাংশ দুষ্কৃতিকাৰীয়ে চলোৱা হিংসাত্মক ঘটনা সন্দৰ্ভত তদন্ত চলাই আছে গৃহ বিভাগ আৰু অসম আৰক্ষীয়ে ৷
কাৰ প্রৰোচনাত আৰু কেনেধৰণৰ উৰাবাতৰিৰ ফলত যোৱা ১০ ডিচেম্বৰৰ পৰা ১২ ডিচেম্বৰলৈ ভয়াৱহ হিংসাত্মক ঘটনা সংঘটিত হ’ল, তাৰ পুংখানুপুংখ তদন্তত নামি পৰিছে অসম আৰক্ষীৰ কেইবাটাও শাখা ৷
অসম আৰক্ষীয়ে গুৱাহাটীৰ লগতে ডিব্রুগড়, শোণিতপুৰ, গোলাঘাট আদি জিলাত হোৱা ভয়াৱহ হিংসাত্মক ঘটনাৰ বিস্তৃত তদন্ত আৰম্ভ কৰিছে ৷ আছু আৰু নেছ’ই আহ্বান জনোৱা উত্তৰ–পূব বন্ধৰ দিনা কি উৰাবাতৰিৰ ভিত্তিত ৰাজপথলৈ প্রতিবাদীসকল ওলাই আহিল, সেই সন্দর্ভত তদন্তত সর্বাধিক গুৰুত্ব আৰোপ কৰা হৈছে ৷
সূত্রটোৱে ইয়াকো উল্লেখ কৰে যে ৯ ডিচেম্বৰৰ অসম বন্ধৰ কিছুদিন পূর্বৰ পৰাই ফেচবুক, হোৱাটছএপত নাগৰিকত্ব সংশোধনী আইনখন সন্দর্ভত উচটনিমূলক চর্চা চলিছিল ৷ সেই মেছেজসমূহ তথা ফেচবুকৰ পোষ্টসমূহ পৰীক্ষা কৰি থকা হৈছে ৷ সেই সময়ছোৱাত বাংলাদেশৰ পৰা ১ কোটি ৭০ লাখ হিন্দু বাংলাদেশী আহিব বুলি যথেষ্ট উচটনিমূলক বার্তাৰ আদান–প্রদান হৈছিল ৷ এই বিষয়সমূহো তদন্তৰ প্রক্রিয়ালৈ অনা হৈছে ৷
মন কৰিবলগীয়া যে ১১ ডিচেম্বৰত জনতা ভৱনৰ সন্মুখত সংঘটিত হিংসাত্মক ঘটনা যে উচটনিত সংঘটিত হৈছিল, সেয়া ইতিমধ্যে ৰাজ্য চৰকাৰে তথ্যসহকাৰে উদঙাই দিছে ৷ আনকি ইয়াৰ আঁৰত প্রদেশ যুৱ কংগ্রেছৰ নেতৃত্বত থকা একাংশৰ প্রৰোচনামূলক কার্যৰ বাবে ভয়াৱহ পৰিস্থিতি সৃষ্টি হোৱাৰ তথ্য–প্রমাণো চৰকাৰে দাঙি ধৰিছে ৷
শেহতীয়াকৈ আৰক্ষীয়ে প্রতিবাদৰ পূর্বে আৰু প্রতিবাদৰ সময়ছোৱাত ১০০টা লোকেচনৰ পৰা অহা ফেচবুক আৰু হোৱাটছএপৰ বিভিন্ন পোষ্টৰ পৰীক্ষা আৰম্ভ কৰিছে ৷ অসম আৰক্ষীয়ে উজনি অসমত সংঘটিত হিংসাত্মক ঘটনা সন্দর্ভত আলফা (স্বা) জড়িত থকাৰ সম্ভাৱনাকো বিশেষভাৱে গ্রহণ কৰিছে ৷ আনকি এই সন্দর্ভত আইন–শৃংখলাৰ দায়িত্বত থকা এ ডি জি পি জি পি সিঙে উল্লেখ কৰা অনুসৰি ১১ আৰু ১২ ডিচেম্বৰৰ হিংসাত্মক প্রতিবাদৰ সৈতে আলফা (স্বা) জড়িত থকাৰ সম্ভাৱনাক নুই কৰিব নোৱাৰি ৷ বিষয়টো বিশেষভাৱে পর্যবেক্ষণ কৰিছে আৰক্ষীয়ে ৷
স্মর্তব্য যে ৰাজধানী দিছপুৰ তথা ইয়াৰ আশে–পাশে হোৱা হিংসাত্মক ঘটনাৰ সকলো দিশ পর্যবেক্ষণ কৰি আছে অসম আৰক্ষীৰ এ পি আৰ অ’ৰ এ ডি জি পি এছ এন সিঙে ৷ সেইদৰে গুৱাহাটী পশ্চিম অংশৰ আইন–শৃংখলাৰ দিশ তদাৰক কৰিছে চি আই ডিৰ এ ডি জি পি এল আৰ বিষ্ণই, গুৱাহাটীৰ মধ্য অংশৰ পৰিস্থিতি তদাৰক কৰি আছে উপ–মহাপৰিদর্শক তথা এ এছ টি চিৰ পৰিচালন সঞ্চালক ৰূপে ডেপুটেচনত থকা আনন্দপ্রকাশ তিৱাৰীয়ে৷ আনহাতে, ডিব্রুগড়ৰ পৰিস্থিতি পর্যবেক্ষণ কৰিছে অগ্ণিনির্বাপক বাহিনীৰ এ ডি জি পি ৱাই কে গৌতমে৷ শেহতীয়া পৰিস্থিতিত সামূহিক পর্যবেক্ষণ কৰি আছে অতিৰিক্ত আৰক্ষী সঞ্চালকপ্রধান (আইন–শৃংখলা) জি পি সিঙে ৷ ইফালে, গুৱাহাটীৰ লগতে ৰাজ্যৰ ভিন্ন প্রান্তত প্রতিবাদৰ নামত একাংশই চলোৱা ধ্বংসলীলা তথা ক্ষয়–ক্ষতিৰ সবিশেষ পৰীক্ষা আৰম্ভ কৰিছে গড়কাপ্ঢানী বিভাগে৷