নিয়মীয়া বাৰ্তা
অসমৰ সৰ্বাধিক প্ৰচলিত দৈনিক বাতৰিকাকত

মাতৃভাষা মাধ্যমৰ শিক্ষানুষ্ঠান বন্ধৰ পৰিকল্পনা নাই চৰকাৰৰ

নিয়মীয়া বাৰ্তা,৫ আগষ্টঃ অসমত তৃতীয় শ্রেণীৰ পৰা দ্বাদশ শ্রেণীলৈ গণিত আৰু বিজ্ঞান ইংৰাজী মাধ্যমত শিকাবলৈ ৰাজ্য চৰকাৰে গ্রহণ কৰা সিদ্ধান্তক লৈ তীব্র প্রতিক্রিয়া সৃষ্টি হৈছে৷ চৰকাৰৰ এই সিদ্ধান্তই ৰাজ্যৰ মাতৃভাষা মাধ্যমৰ শিক্ষানুষ্ঠানসমূহলৈ ভাবুকি কঢ়িয়াই আনিব বুলি দল–সংগঠনসমূহে আশংকা প্রকাশ কৰিছে৷ ইয়াৰ মাজতে শিক্ষামন্ত্রী ডাঃ ৰণোজ পেগুৱে প্রতিক্রিয়া প্রকাশ কৰি কয় যে ক’তো এখনো মাতৃভাষা মাধ্যমৰ শিক্ষানুষ্ঠান বন্ধ কৰিবলৈ চৰকাৰৰ পৰিকল্পনা নাই৷ অথবা মাতৃভাষা প্রত্যাহাৰ কৰাৰো চৰকাৰে সিদ্ধান্ত লোৱা নাই৷ বৰঞ্চ মাতৃভাষাৰ লগে লগে ইংৰাজী ভাষাৰ শিক্ষাত গুৰুত্ব আৰোপ কৰা হৈছে৷

আনহাতে, কিয় তৃতীয় শ্রেণীৰ পৰা গণিত আৰু বিজ্ঞান বিষয় ইংৰাজীত শিকাবলৈ সিদ্ধান্ত গ্রহণ কৰা হৈছে, সেয়া স্পষ্ট কৰি ডাঃ পেগুৱে কয়– ‘ৰাষ্ট্রীয় শিক্ষা নীতি–২০২০ৰ অধীনত পূর্বৰ ১+২ৰ পৰিৱর্তে ++৩+৪ শিক্ষা ব্যৱস্থা গ্রহণ কৰা হৈছে৷ ইয়াৰে প্রথমটো স্তৰ হৈছে বুনিয়াদী স্তৰ৷ য’ত তিনিটা শ্রেণী থাকিব৷ ৬ বছৰলৈ এই বুনিয়াদী শিক্ষা গ্রহণ কৰিব৷ ৬ বছৰত আৰম্ভ হ’ব প্রথম শ্রেণী৷ এই স্তৰ হ’ব প্রস্তুতি স্তৰ৷ এই প্রস্তুতি স্তৰত থাকিব তৃতীয়, চতুর্থ আৰু পঞ্চম শ্রেণী৷ প্রস্তুতি স্তৰটো মাধ্যমিক শ্রেণীলৈ প্রস্তুতি অর্থাৎ মাধ্যমিক শিক্ষাৰ বাবে তৃতীয় শ্রেণীৰ পৰাই প্রস্তুতি আৰম্ভ কৰিব লাগিব৷ সেয়েহে আমি তৃতীয় শ্রেণীৰ পৰা দুটা বিষয় ইংৰাজীত শিকাবলৈ সিদ্ধান্ত গ্রহণ কৰিছোঁ৷’ ইফালে নতুন শিক্ষা নীতিৰ অধীনত দুটা বিষয় অতিৰিক্তভাৱে অসমীয়া, বড়ো অথবা বাংলা মাধ্যমত শিকিব পাৰিব৷ সেই দুটা হৈছে ভূগোল আৰু বুৰঞ্জী৷ ভূগোলত পৰিৱেশ অধ্যয়ন সন্নিৱিষ্ট হৈ থাকিব৷ সেইদৰে বুৰঞ্জীৰ লগতে ৰাজনীতি বিজ্ঞান, স্বাধীনতা সংগ্রাম, সংবিধান, আইন আদি সন্নিৱিষ্ট হ’ব৷ পূর্বে অসমীয়াত কেৱল সমাজ বিজ্ঞান আছিল৷ এতিয়া মাতৃভাষা মাধ্যমত ওপৰঞ্চি দুটা বিষয় ছাত্র–ছাত্রীসকলে অধ্যয়নৰ সুযোগ লাভ কৰিব৷ মাতৃভাষাৰ লগতে ইংৰাজী ভাষাও শিকি যোৱাৰ সুবিধা শিক্ষার্থীসকলে লাভ কৰিব৷

শিক্ষার্থীসকলে লাভ কৰা বিভিন্ন সমস্যা সন্দর্ভত অৱগত কৰি শিক্ষামন্ত্রীগৰাকীয়ে কয়– ‘একাদশ অথবা স্নাতকত যেতিয়া শিক্ষার্থীসকলে হঠাৎ ইংৰাজীত পঢ়িবলগীয়া হয়, তেতিয়া তেওঁলোক বহুত অসুবিধাৰ সন্মুখীন হয়৷ ছাত্র–ছাত্রীসকলৰ লগত আমি দিনে–নিশাই কথা পাতিয়েই থাকোঁ৷ তেওঁলোকে জনাইছে যে এয়াই তেওঁলোকৰ অসুবিধা৷ দশমলৈ মাতৃভাষাত অধ্যয়ন কৰাৰ পাছত একাদশত হঠাৎ ইংৰাজী মাধ্যমত পঢ়িব লগা হ’লে তেওঁলোকৰ অসুবিধা হয়৷ চৰকাৰে মাতৃভাষাৰ লগে লগে ইংৰাজী ভাষাৰ শিক্ষাক গুৰুত্ব প্রদান কৰিছে৷ বৰঞ্চ মাতৃভাষা মাধ্যমক অধিক শক্তিশালী কৰাৰহে সিদ্ধান্ত গ্রহণ কৰিছে, যাৰ বাবে আমি বুৰঞ্জী আৰু ভূগোল মাতৃভাষাত শিকাম আৰু গণিত, বিজ্ঞান ইংৰাজী ভাষাত শিকাম৷ যাতে মাতৃভাষা আৰু ইংৰাজী ভাষা দুয়োটাই শিক্ষার্থীসকলে সমানে শিকিব পাৰে৷’ উল্লেখ্য যে তৃতীয় শ্রেণীৰ পৰা দ্বাদশ শ্রেণীলৈ গণিত আৰু বিজ্ঞান ইংৰাজী মাধ্যমত শিকাবলৈ চৰকাৰে এক কেবিনেট সিদ্ধান্ত গ্রহণ কৰিছে৷ চৰকাৰৰ এই সিদ্ধান্তৰ পাছতে ৰাজ্যৰ বিভিন্ন দল–সংগঠনে প্রতিক্রিয়া প্রকাশ কৰাৰ লগতে ইয়াৰ বিৰোধিতা কৰি শীঘ্রে এই সিদ্ধান্ত প্রত্যাহাৰৰ দাবী উত্থাপন কৰিছে৷ শেহতীয়াকৈ আছু, এবছু, অসম সাহিত্য সভা, বড়ো সাহিত্য সভাই এখন যৌথ বৈঠক অনুষ্ঠিত কৰি চৰকাৰক গণিত আৰু বিজ্ঞানত ইংৰাজী মাধ্যম প্রৱর্তনৰ সিদ্ধান্ত প্রত্যাহাৰ কৰিবলৈ দাবী উত্থাপন কৰিছে৷

You might also like