নিয়মীয়া বাৰ্তা, ১১ মাৰ্চঃ অসমৰ তিনিখন আসনৰ বাবে ২৬ মাৰ্চত অনুষ্ঠিত হ’ব লগা ৰাজ্যসভা নিৰ্বাচনৰ প্ৰথমখন আসনত বিজেপিয়ে প্ৰক্ষেপ কৰিব প্ৰাক্তন কংগ্ৰেছী তথা সাংসদ ভুৱনেশ্বৰ কলিতাক । ইতিমধ্যে ভাৰতীয় জনতা পাৰ্টীৰ তৰফৰ পৰা ঘোষণা কৰা হৈছে ভুৱনেশ্বৰ কলিতাৰ নাম ।
ইফালে, ৰাজ্যসভাৰ দ্বিতীয়খন আসনত বিজেপিয়ে মিত্ৰজোঁট অৰ্থাৎ বিপিএফৰ প্ৰাৰ্থী বিশ্বজিত দৈমাৰীক প্ৰক্ষেপ কৰাৰ কথা ঘোষণা কৰিছে । বুধবাৰে নিজৰ মনোনয়ন দাখিল কৰে বিশ্বজিত দৈমাৰীয়ে ।
উল্লেখ্য যে, ৰাজ্যসভাৰ তৃতীয়খন আসনত বিৰোধী কংগ্ৰেছ আৰু এআইইউডিএফে উমৈহতীয়া বিশিষ্ট সাংবাদিক অজিত কুমাৰ ভূঞাক প্ৰক্ষেপ কৰাৰ কথা ঘোষণা কৰিছে । বুধবাৰে দিল্লীত দুয়োটা দলে উমৈহতীয়াভাৱে আয়োজন কৰা সংবাদমেলত অজিত ভূঞাই তেওঁলোকৰ প্ৰাৰ্থী হ’ব বুলি উল্লেখ কৰে ।