অসম সাহিত্য সভাৰ লখিমপুৰ জিলা সমিতিৰ অন্তৰ্গত ধলপুৰ শাখা (শতদল) সাহিত্য সভাৰ মধ্যকালীন অধিৱেশন কালি ধলপুৰস্থিত চিত্ৰকূট ৰিজৰ্টত দিনজোৰা কাৰ্যসূচীৰে অনুষ্ঠিত হয় ৷ শাখা সমিতিৰ সম্পাদক চন্দ্ৰ কুমাৰ দত্তই আঁত ধৰা অধিৱেশনত সভাপতিত্ব কৰে শাখা সমিতিৰ সভাপতি তৰুণ বৰাই ৷ কমাৰচুক নামঘৰ মহিলা সমিতিৰ মহিলাসকলে “চিৰ চেনেহী…” শীৰ্ষক সমৱেত সংগীতেৰে অধিৱেশনৰ মঞ্চ মুকলি কৰে ৷
অধিৱেশনখনত অৱসৰপ্ৰাপ্ত শিক্ষক নাৰায়ণ চেতিয়াই নিৰ্দিষ্ট বক্তাৰ ভাষণ প্ৰদান কৰে ৷ শিক্ষক চেতিয়াই নতুন প্ৰজন্মক গ্ৰন্থ অধ্যয়নৰ প্ৰতি আকৃষ্ট কৰিবলৈ সাহিত্য সভাৰ দৰে অনুষ্ঠানসমূহে বিশেষ উদ্যোগ ল’ব লাগিব বুলি বক্তব্যত উল্লেখ কৰে ৷ লখিমপুৰ জিলা সাহিত্য সভাৰ পৰামৰ্শদাতা গোলাপ বৰুৱা অধিৱেশনত পৰ্যবেক্ষক হিচাপে উপস্থিত থাকে ৷
সভাখনত দেৱদৰ্শন দত্ত আৰু ময়ূৰকৃষ্ণা দত্তই দ্বৈত কণ্ঠৰে কবিতা আবৃত্তি কৰে ৷ উক্ত সভাত চিকিৎসা বিজ্ঞানত অধ্যয়নৰ সুযোগ পোৱা মেধাৱী ছাত্ৰ নীহাৰ বৰাক সম্বৰ্ধনা জনোৱা হয় ৷ ধলপুুৰ শাখা সাহিত্য সভাৰ প্ৰাক্তন সভাপতি মিত্ৰদেৱ মহন্ত, অৱসৰপ্ৰাপ্ত শিক্ষক ব্ৰজেন শইকীয়া, দেৱেন বৰুৱা, অৱসৰপ্ৰাপ্ত বন বিষয়া পৱন চন্দ্ৰ দাস আদিয়ে বিশিষ্ট অতিথি হিচাপে অংশগ্ৰহণ কৰে ৷
সভাখনত ধলপুৰ শাখা সাহিত্য সভাৰ অন্তৰ্গত অঞ্চলৰ ২০২৫ বৰ্ষৰ ১৪গৰাকী লোকক অসম সাহিত্য সভাই স্বীকৃতি প্ৰদান কৰা আজীৱন সভ্যৰ মানপত্ৰ প্ৰদান কৰে ৷ তেওঁলোক হ’ল ক্ৰমে দেৱেশ্বৰ শইকীয়া, উমেশ শইকীয়া, বোধেশ্বৰ শইকীয়া, ভূপেন আৰন্ধৰা, পুষ্পলতা ফুকন, তিলেশ্বৰ গগৈ, সুৰেন শইকীয়া, বীণা দেৱী, ডিম্বেশ্বৰ গন্ধীয়া, হেম দত্ত, অমিয় কুমাৰ বৰা, চন্দ্ৰকান্ত দাস ৷ সভাত গীত-মাত, কবিতা আবৃত্তি আদি পৰিৱেশিত হয় ৷
নিয়মীয়া বাৰ্তা, ধলপুৰ, ২৩ ফেব্ৰুৱাৰী :