নিয়মীয়া বাৰ্তা, ১৮ জানুৱাৰীঃ অসম আৰক্ষীৰ উপ–পৰিদর্শক নিযুক্তি কেলেংকাৰিৰ অন্যতম অভিযুক্ত অক্ষয়চান্দ বৈদে জামিন লাভ কৰিছে৷ যোৱা ১২ জানুৱাৰীত বৈদৰ জামিন মঞ্জুৰ কৰিছে গুৱাহাটী উচ্চ ন্যায়ালয়ে৷ অৱশ্যে চিকিৎসাজনিত কাৰণত প্রাথমিকভাৱে ১৫ দিনৰ বাবে তেওঁ লাভ কৰিছে জামিন৷ পৰৱর্তী সময়ত চিকিৎসকৰ পৰামর্শ অনুসৰি জামিনৰ ম্যাদ বৃদ্ধি সন্দর্ভত পুনৰ বিবেচনা কৰিব গুৱাহাটী উচ্চ ন্যায়ালয়ে৷
ইপিনে, একেটা গোচৰত অভিযুক্ত আন ৮জনে জামিন লাভ কৰিছে বুলি জানিব পৰা গৈছে৷ উল্লেখ্য যে উপ–পৰিদর্শক (এছআই) নিযুক্তি কেলেংকাৰিত চিকিৎসাধীন অৱস্থাতে অক্ষয়চান্দ বৈদক গ্রেপ্তাৰ কৰিছিল আৰক্ষীয়ে৷ তেওঁৰ দ্বাৰা পৰিচালিত ক’চিং চেণ্টাৰৰ পৰা প্রশ্ণকাকত ফাদিল হোৱা বুলি অভিযোগ উত্থাপিত হৈছিল৷