জুবিন ক্ষেত্ৰত উদ্ভণ্ডালি কৰাক লৈ প্ৰতিক্ৰিয়া অসমীয়া যুৱমঞ্চৰ

সোণাপুৰৰ জুবিন গাৰ্গৰ সমাধি ক্ষেত্ৰত গৈ এচামে উশৃংখল পৰিৱেশৰ সৃষ্টি কৰাৰ লৈ তীব্ৰ প্ৰতিক্ৰিয়া প্ৰকাশ কৰিছে অসমীয়া যুৱমঞ্চৰ সভাপতি যাদৱ গগৈয়ে৷

তেওঁ কয় যে জুবিন দাৰ সমাধি ক্ষেত্ৰত আজি আমি উদ্ভণ্ডালি হোৱা দেখিবলৈ পাইছো৷ কোনোবই মদ খাই মায়াবিনী গাইছে৷ মদ খাই জুবিনৰ সমাধি ক্ষেত্ৰত অতপালি নকৰিবলৈ সকীয়নি প্ৰদান কৰে অসমীয়া যুৱমঞ্চৰ সভাপতিগৰাকীয়ে৷

তেওঁ চৰকাৰক এইবোৰৰ বিৰুদ্ধে ব্যৱস্থা গ্ৰহণ কৰিবলৈ আহ্বান জনায়৷ আনহাতে, সমাধি ক্ষেত্ৰত ৰাজনৈতিক দলবোৰে ৰাজনৈতিক শ্ল’গান দিয়াক লৈও তীব্ৰ প্ৰতিক্ৰিয়া প্ৰকাশ কৰে অসমীয়া যুৱমঞ্চই৷ যুৱমঞ্চৰ সভাপতিগৰাকীয়ে কয় যে জুবিন গাৰ্গৰ সমাধি ক্ষেত্ৰত ৰাজনৈতিক শ্ল’গান দিয়া কাৰ্য বন্ধ হ’ব লাগে৷ কাৰণ আমি ন্যায়ৰ বাবে প্ৰতিবাদ কৰিছো৷

জুবিন দাৰ পৰিয়ালে ফাষ্টট্ৰেক আদালতৰ জৰিয়তে ন্যায় বিচাৰিছে৷ আমি ন্যায় পাবই লাগিব৷ ফাষ্টট্ৰেক আদালতৰ জৰিয়তে শীঘ্ৰে ন্যায় প্ৰদান কৰিবলৈ তেওঁ মুখ্যমন্ত্ৰীক আহ্বান জনায়৷ জুবিন দাৰ সমাধি ক্ষেত্ৰত মদ খাই উদ্ভণ্ডালি কৰাটো অসমীয়া যুৱমঞ্চই বিচৰা নাই বুলি তেওঁ উল্লেখ কৰি এই ক্ষেত্ৰত চৰকাৰক কঠোৰ ব্যৱস্থা গ্ৰহণ কৰিবলৈ দাবী জনায়৷

নিয়মীয়া বাৰ্তা ডেস্ক, ২৫ অক্টোবৰ