ডিজিটেল ডেস্ক, ২৩ মাৰ্চ : তিতাবৰ বিধানসভা সমষ্টিৰ কংগ্ৰেছ বিধায়ক ভাস্কৰ জ্যোতি বৰুৱাই অৱশেষত আজি দলত্যাগ কৰে। আগন্তুক নিৰ্বাচনৰ বাবে দলীয় টিকটৰ পৰা বঞ্চিত হোৱাৰ পিছতেই এই সিদ্ধান্ত গ্ৰহণ কৰে বৰুৱাই। আজি তেওঁ অসম প্ৰদেশ কংগ্ৰেছ কমিটীৰ সভাপতিলৈ এখন আনুষ্ঠানিক পত্ৰ প্ৰেৰণ কৰি দলত্যাগ কৰাৰ কথা ঘোষণা কৰে।
দীৰ্ঘদিন ধৰি কংগ্ৰেছৰ থকা ভাস্কৰ জ্যোতি বৰুৱাৰ এই সিদ্ধান্তই ৰাজনৈতিক পৰিৱেশত যথেষ্ট চাঞ্চল্যৰ সৃষ্টি কৰিছে। দলৰ ভিতৰত টিকট বিতৰণক লৈ চলি থকা অসন্তুষ্টি আৰু মতভেদৰ ফলতেই তেওঁ এই পথ বাছি লোৱাৰ কথা ৰাজনৈতিক মহলে অনুমান কৰিছে।
ইফালে, দলত্যাগ কৰাৰ লগে লগে ভাস্কৰ জ্যোতি বৰুৱাই তিতাবৰ সমষ্টিত নিৰ্দলীয় প্ৰাৰ্থী হিচাপে অৱতীৰ্ণ হ’ব বুলিও জানিব পৰা গৈছে। ইয়াৰ ফলত তিতাবৰৰ আগন্তুক নিৰ্বাচনী যুঁজ অধিক ৰোমাঞ্চকৰ আৰু ত্ৰিকোণীয় হোৱাৰ সম্ভাৱনা দেখা গৈছে। উল্লেখযোগ্য যে এই ঘটনাৰ পিছত তিতাবৰত কংগ্ৰেছ দলৰ ভিতৰত বিভাজন অধিক স্পষ্ট হ’ব পাৰে বুলি ৰাজনৈতিক বিশ্লেষকসকলে মত প্ৰকাশ কৰিছে। আগন্তুক দিনবোৰত এই সিদ্ধান্তই কিমান প্ৰভাৱ পেলাব, সেয়া সময়ত লক্ষণীয় হ’ব।