নিয়মীয়া বাৰ্তা, ১০ জানুৱাৰীঃ মহামাৰী ক’ৰোনা ভাইৰাছৰ বিৰুদ্ধে যুঁজিবলৈ তথা ক’ভিড–১৯ প্রতিৰোধ কৰিবলৈ দেশত জৰুৰীভাৱে অনুমতি প্রদান কৰা হৈছে ক’ভিড–১৯ ভেকচিন ক’ভিশ্বিল্ড আৰু ক’ভাক্সিনক৷ অহা ১৬ জানুৱাৰীৰ পৰা দেশজুৰি চলিবলগীয়া গণ টিকাকৰণত ব্যৱহূত হ’ব এই দুবিধ ভেকচিন৷ যোৱা তিনি জানুৱাৰীত ড্রাগ্ কণ্ড্র’লাৰ জেনেৰেল অৱ ইণ্ডিয়াই (ডি চি জি আই) গণ টিকাকৰণৰ বাবে অনুমতি প্রদান কৰাৰ পাছতে ক’ভিশ্বিল্ড আৰু ক’ভাক্সিন বিতর্কত সাঙোৰ খাই পৰে৷ দুয়োটা ভেকচিনৰে পৰীক্ষণ সন্দর্ভত বিশেষ তথ্য জ্ঞাত নোহোৱাৰ পৰিপ্রেক্ষিতত দেশৰ একাংশ লোকে ভেকচিন দুটাক লৈ বিতর্ক সৃষ্টি কৰে৷ পৰীক্ষণ সম্পূর্ণ নোহোৱাকৈ ভেকচিন দুটা প্রয়োগৰ অনুমতি দিয়া সন্দর্ভত চলা বিতর্কৰ অৱসান ঘটাই দুয়োটা ভেকচিন নির্মাণ কোম্পানীয়ে নিজৰ স্থিতি অৱগত কৰে৷ ভাৰত বায়’টেকৰ ক’ভাক্সিন আৰু ছিৰাম ইনষ্টিটিউট অৱ ইণ্ডিয়াৰ ক’ভিশ্বিল্ড দেশত প্রদানৰ বাবে দুয়োটা কোম্পানীয়ে সহযোগ কৰাৰ প্রতিশ্রুতি দি বিবৃতি প্রকাশ কৰে৷
উল্লেখ্য যে ক’ভাক্সিন হৈছে ভাৰতৰ হায়দৰাবাদস্থিত ভাৰত বায়’টেকে ইণ্ডিয়ান কাউন্সিল ফৰ মেডিকেল ৰিছার্চ (আই চি এম আৰ) আৰু নেচনেল ইনষ্টিটিউট অৱ ভাইৰ’লজীৰ সৈতে যুটীয়াভাৱে বিকশিত কৰা ক’ভিড–১৯ ভেকচিন৷ এই ক’ভিড–১৯ ভেকচিন ক’ভাক্সিন প্রস্তুত কৰা হৈছে চার্ছ ক’ভ–২ ক’ৰোনা ভাইৰাছৰ পৰা৷ মৃত ক’ৰোনা ভাইৰাছ যাক ‘ইনএকটিভ’ ভেকচিন বুলি চিকিৎসা বিজ্ঞানত কোৱা হয়৷ আই চি এম আৰে চার্ছ ক’ভ–২ আইচলেট কৰি সেয়া ভাৰত বায়’টেকক প্রদান কৰে আৰু ভাৰত বায়’টেকে ভেকচিন বিকশিত কৰে৷
আনপিনে আমেৰিকা যুক্তৰাষ্ট্রই ঔষধ কোম্পানী এষ্ট্রাজেনেকা আৰু অক্সফ’ড বিশ্ববিদ্যালয়ৰ দ্বাৰা বিকশিত ক’ভিড–১৯ ভেকচিন হৈছে ক’ভিশ্বিল্ড৷ এই ভেকচিনটোৰ উৎপাদন আৰু ভাৰতত পৰীক্ষণৰ দায়িত্বত আছে পুনেস্থিত ছিৰাম ইনষ্টিটিউট অৱ ইণ্ডিয়া৷ এই ভেকচিনটোক এ জেড ডি ১২২২ ভেকচিন বুলি প্রস্তুত কৰা হৈছে যদিও ব্রেণ্ড নেম ক’ভিশ্বিল্ড৷ এই ভেকচিনটো চার্ছ ক’ভ–২ ক’ৰোনা ভাইৰাছৰ বিপৰীতে এডন’ভাইৰাছৰ পৰা বিকশিত কৰা হৈছে৷ দুয়োটা ভেকচিনেই বেজীৰ জৰিয়তে মানৱ দেহৰ কোষত প্রয়োগ কৰা হয়৷ লক্ষণীয় যে ইউৰোপ আৰু ব্রাজিলত পৰীক্ষণৰ সময়ত ক’ভিশ্বিল্ডৰ ফলপ্রসূতা গড় ৭০ শতাংশ৷ কিন্তু ভাৰতত এই ভেকচিনটোৰ পৰীক্ষণৰ ফলপ্রসূতা প্রকাশ কৰা হোৱা নাই৷ আনপিনে ভাৰত বায়’টেকৰ ক’ভাক্সিন সন্দর্ভত পৰীক্ষণৰ বিতং তথ্য প্রকাশ কৰাৰ পূর্বেই ডি চি জি আয়ে জৰুৰীকালীন প্রয়োগত অনুমতি জনাইছে৷
তাৎপর্যপূর্ণ যে দুয়োটা ভেকচিনৰ প্রতিটোৱেই দুটা ড’জৰ৷ দুয়োটা ভেকচিনে সংৰক্ষণ কৰি ৰাখিবলৈ সহজ৷ কিয়নো এই ভেকচিন দুটা ২–৮ ডিগ্রী চেলছিয়াছত সংৰক্ষিত কৰি ৰাখিব পাৰি৷ যাৰ বাবে এই ভেকচিনকেইটা চিকিৎসা কেন্দ্রত সংৰক্ষণ কৰি ৰখাৰ লগতে বিভিন্ন স্থানলৈ সৰবৰাহ কৰাত সহজ হয়৷
আনপিনে ভেকচিনৰ মূল্য কেন্দ্রীয় চৰকাৰে নিয়ন্ত্রণ ৰাখি বিনামূলীয়াকৈ প্রদান কৰিব যদিও বিভিন্ন প্রতিবেদনত প্রকাশ পোৱা মতে, দুয়োটা ভেকচিনৰ বজাৰ মূল্য পৃথক৷ ক’ভিশ্বিল্ডৰ মূল্য চৰকাৰী মতে ৪০০–৪৫০ টকা অথবা প্রতিটো ড’জত ২০০–২২৫ টকা৷ দেশীয় ভেকচিন ক’ভাক্সিনৰ মূল্য নির্ধাৰিত কৰা হোৱা নাই যদিও ভাৰত বায়’টেকৰ সূত্র মতে, এই ভেকচিনৰ মূল্য ৩৫০ টকা৷ ভেকিচিন দুটাৰ সুৰক্ষাক লৈ প্রশ্ণ উত্থাপন হ’লেও ডি চি জি আই ভি জি চোমানিয়ে প্রকাশ কৰা মতে, দুয়োটা ভেকচিনেই ১০০ শতাংশ নিৰাপদ৷ প্রতিটো ভেকচিনতে পার্শ্বক্রিয়া হিচাপে মৃদু জ্বৰ, বিষ আৰু এলার্জী সাধাৰণ থাকিব পাৰে৷