নিয়মীয়া বাৰ্তা ৩০ অক্টোবৰঃ ৰাজ্যিক জৈৱ–বৈচিত্র্য পৰিষদৰ বেংক একাউণ্টৰ পৰা জাল চহীৰে ২৫.৫ লাখ টকা উলিয়াই আত্মসাৎ কৰা প্রৱঞ্চক নৱজ্যোতি ডেকা (২৪)ক শুকুৰবাৰে দিছপুৰ আৰক্ষীয়ে গ্রেপ্তাৰ কৰে৷ আৰক্ষীয়ে জানিবলৈ দিয়া মতে, ৰাজ্যিক জৈৱ–বৈচিত্র্য পৰিষদৰ ইউ বি আই বেংকৰ একাউণ্টৰ পৰা অকর্তৃত্বশীলভাৱে জাল চহীৰে নৱজ্যোতি ডেকাই ২৫.৫ লাখ টকা উলিয়াই নিছিল৷ যোৱা ২২ অক্টোবৰত মজিবুৰ ৰহমানৰ চহী জাল কৰি ইউ বি আই বেংকৰ পৰা এই বিশাল পৰিমাণৰ ধন উলিয়াই নিয়া ঘটনা সন্দর্ভত দিছপুৰ থানাত এজাহাৰ দাখিল কৰিছিল পৰিষদৰ বিষয়া পৱন কুমাৰে৷ উক্ত এজাহাৰৰ ভিত্তিত ভাৰতীয় দণ্ডবিধিৰ ৪২০/৪৬৮/৪৭১ ধাৰাৰ অধীনত দিছপুৰ থানাত ৩৮৭১/২০২১ নম্বৰত এটা গোচৰ ৰুজু কৰে৷ উক্ত গোচৰটোৰ ভিত্তিত দিছপুৰ আৰক্ষীয়ে তদন্ত চলাই বাঘৰবড়ীৰ পৰা প্রৱঞ্চক নৱজ্যোতিক গ্রেপ্তাৰ কৰে৷ আজি প্রৱঞ্চক নৱজ্যোতিক আদালতত হাজিৰ কৰাই দিছপুৰ আৰক্ষীয়ে তিনি দিনৰ জিম্মাত লয়৷