ছেনিটাইজেচনৰ নামত প্রহসন পৌৰ নিগমৰ, দায়িত্বত থকা ৯১টা স্বেচ্ছাসেৱী সংগঠন ক’ত?

নিয়মীয়া বার্তা, ২৬ জুনঃ বিশ্বজুৰি মহামৰাৰীৰ ৰূপ লোৱা ক’ৰোনা ভাইৰাছৰ সামাজিক সংক্রমণ গুৱাহাটী মহানগৰীত উদ্বেগজনকভাৱে বৃদ্ধি পাইছে৷ ক’ভিড–১৯ৰ ভয়াৱহতাৰ প্রতি লক্ষ্য ৰাখি কামৰূপ মহানগৰ জিলা প্রশাসনে ১১টাকৈ ৱার্ডত পুনৰ ১৪ দিনৰ বাবে লকডাউন ঘোষণা কৰিছে৷ ক’ৰোনা ভাইৰাছৰ সংক্রমণ ৰোধৰ বাবে আক্রান্ত অঞ্চল আৰু আৱাসিক এলেকাৰ লগতে মহানগৰীৰ বাট–পথ ছেনিটাইজেচন কৰাৰ বাবে চৰকাৰে নির্দেশ জাৰি কৰিছিল৷ চৰকাৰৰ নির্দেশ অনুসৰি গুৱাহাটী পৌৰ নিগমে কনঢেইনমেণ্ট জ’ন, ক’ভিড আক্রান্ত অঞ্চলত প্রতিদিনে ছেনিটাইজেচন কৰিব লাগে৷

কিন্তু গুৱাহাটী মহানগৰীত এতিয়া ছেনিটাইজেচন প্রক্রিয়া প্রহসনত পৰিণত হোৱাৰ উপক্রম ঘটিছে৷ কামৰূপ (ম) জিলাত পৰহি নিশালৈকে ৬৫৩জন লোক ক’ৰোনাত আক্রান্ত হৈ চিকিৎসাধীন হৈ আছে৷ সামাজিক সংক্রমণত ক’ৰোনাত আক্রান্ত লোকৰ সংখ্যা প্রতিদিনে ব্যাপক হাৰত বৃদ্ধি পাইছে৷ কিন্তু ক’ভিড–১৯ৰ সংক্রমণ ৰোধৰ বাবে মহানগৰীৰ ছেনিটাইজেচন কৰাত ব্যর্থ হৈছে গুৱাহাটী পৌৰ নিগম৷ যোৱা ২৪ মার্চত দেশজুৰি প্রথম পর্যায়ৰ লকডাউন ঘোষণা হোৱাৰ পাছতে ক’ভিড–১৯ত আক্রান্ত হোৱাৰ সম্ভাৱনাৰ প্রতি লক্ষ্য ৰাখি মহানগৰীৰ বাট–পথ, চৰকাৰী কার্যালয়কে ধৰি বিভিন্ন স্থানত পৌৰ নিগমে ছেনিটাইজেচন কৰিছিল৷ গুৱাহাটী মহানগৰীত ক’ৰোনা ভাইৰাছত আক্রান্ত লোকৰ সংখ্যা দিনক–দিনে বৃদ্ধি পোৱাৰ পাছত পৌৰ নিগমে মহানগৰীত ছেনিটাইজেচন কৰিবলৈ ৯১টা এনজিঅ’ক দায়িত্ব দিছিল৷

গুৱাহাটী পৌৰ নিগমৰ ৬টা জ’নৰ অন্তর্গত অঞ্চলসমূহত বিভাগীয় অভিযন্তাৰ সহযোগত এই ছেনিটাইজেচন প্রক্রিয়া চলি আছে৷ কিন্তু পৌৰ নিগম কর্তৃপক্ষৰ হেমাহিৰ বাবে ক’ৰোনাৰ হটস্পট হিচাপে চিনাক্ত হোৱা অঞ্চলসমূহৰ বাহিৰে আন অঞ্চলসমূহৰ ছেনিটাইজেচন নকৰাৰ অভিযোগ উত্থাপন হৈছে৷ গুৱাহাটী মহানগৰীত দিনক দিনে ক’ৰোনা ভাইৰাছত আক্রান্ত লোকৰ সমান্তৰালকৈ কনঢেইনমেণ্ট জ’নৰ সংখ্যাও বৃদ্ধি পাব ধৰিছে৷ বর্তমানলৈকে গুৱাহাটী মহানগৰীত জিলা প্রশাসনে ৩ শতাধিক কনঢেইনমেণ্ট জ’ন ঘোষণা কৰিছে৷

এই কনঢেইনমেণ্ট জ’নসমূহত পৌৰ নিগমে ছেনিটাইজেচন কৰাটো বাধ্যতামূলক৷ ইয়াৰ উপৰি ক’ৰোনা ভাইৰাছৰ সামাজিক সংক্রমণ ৰোধ কৰিবলৈ জনসমাগম হোৱা অঞ্চলসমূহতো ছেনিটাইজেচন কৰাটো অতি দৰকাৰী৷ বর্তমান গুৱাহাটীত দুখন বৰুণ বাহন, ৬খন অগ্নিনির্বাপক বাহিনীৰ গাড়ী, ২২০টা স্প্রে মেচিনকে ধৰি প্রয়োজন সাপেক্ষে অগ্নিনির্বাপক বাহিনীয়ে যোগান ধৰা অতিৰিক্ত গাড়ীৰে পৌৰ নিগমে ছেনিটাইজেচন প্রক্রিয়া অব্যাহত ৰাখিছে৷ কিন্তু পৌৰ নিগম কর্তৃপক্ষৰ হেমাহিৰ বাবে গাড়ী সোমাব নোৱাৰা অঞ্চলসমূহত এনজিঅ’সমূহে ছেনিটাইজেচন কৰা নাই৷

বিভাগীয় হেমাহিৰ বাবেই ছেনিটাইজেচন প্রক্রিয়াত আহি পৰা স্থবিৰতাই গুৱাহাটী মহানগৰীত ভয়াৱহ ৰূপত বৃদ্ধি পোৱা সামাজিক সংক্রমণ ৰোধত হেঙাৰ হিচাপে থিয় দিয়া বুলিও সচেতন লোকসকলে মন্তব্য কৰিছে৷ উল্লেখ্য যে গুৱাহাটী পৌৰ নিগম কর্তৃপক্ষক বিভিন্ন অঞ্চলৰ ৰাইজে ছেনিটাইজেচন নকৰা বুলি অভিযোগ দাখিল কৰিছে৷ কিন্তু পৌৰ নিগম কর্তৃপক্ষই এইক্ষেত্রত কোনো গুৰুত্ব প্রদান কৰা নাই৷ ক’ৰোনা ভাইৰাছৰ সংক্রমণ ৰোধৰ বাবে প্রতিদিনে অঞ্চল বিশেষে ছেনিটাইজেচন কৰাৰ লগতে সমগ্র মহানগীৰত ছেনিটাইজেচন কৰাটো অত্যন্ত জৰুৰী বিষয় হিচাপে বিবেচিত হৈছে৷ এইক্ষেত্রত জিলা প্রশাসনে কি ব্যৱস্থা গ্রহণ কৰে সেয়াও লক্ষণীয় হ’ব৷