নিয়মীয়া বাৰ্তা ১২ মাৰ্চঃ বিশ্বৰ ৯৫ খনতকৈ অধিক দেশলৈ মাৰাত্মক ক’ৰোনা ভাইৰাছৰ বিস্তাৰ ঘটিছে যদিও টাইৱানে এইক্ষেত্রত বিশ্ববাসীৰ বাবে নিদর্শন দাঙি ধৰিছে৷ চীনৰ সমীপৱর্তী টাইৱানত ক’ৰোনাৰ সংক্রমণে কোনোধৰণৰ বিপর্যয় কঢ়িয়াবলৈ সক্ষম হোৱা নাই৷ মাৰাত্মক ক’ৰোনাৰ বিস্তাৰৰ পূর্বেই সকলো ধৰণৰ সতর্ক ব্যৱস্থা গ্রহণ কৰিছে টাইৱানে৷ গতিকে বিশ্বৰ বিশেষজ্ঞ চিকিৎসকসকলে ক’ৰোনাৰ আতংকত পৰা দেশবোৰক টাইৱানৰ পৰা শিক্ষা ল’বলৈ আহ্বান জনাইছে৷ স্মর্তব্য যে চীনৰ ৱুহানত এই ভাইৰাছবিধৰ সংক্রমণ আৰম্ভ হোৱাৰ লগে লগে টাইৱানে বিদেশী লোকৰ প্রৱেশৰ ক্ষেত্রত বিভিন্ন কঠোৰ ব্যৱস্থা গ্রহণ কৰিছিল৷ বিশেষকৈ ভাইৰাছবিধৰ সংক্রমণ ঘটা অঞ্চলবোৰৰ পৰা টাইৱানলৈ অহা লোকসকলৰ ওপৰত তীক্ষ্ণ নজৰ ৰাখিছিল চৰকাৰে৷ গতিকে টাইৱানত এই ভাইৰাছবিধৰ দ্বাৰা সংক্রমিত লোকৰ সংখ্যা অন্য দেশৰ তুলনাত যথেষ্ট কম৷ চীনৰ সীমান্তত থাকিলেও টাইৱানত ক’ৰোনা ভাইৰাছৰ দ্বাৰা সংক্রমিত হৈছে মাত্র ৪৮গৰাকী লোক৷ কিন্তু সমীপৱর্তী চীনত ৮০ হাজাৰতকৈ অধিক লোক এই ভাইৰাছবিধৰ দ্বাৰা আক্রান্ত হৈছে৷