নিয়মীয়া বাৰ্তা, ১২ মার্চঃ এমাহৰ ভিতৰতে ষ্টেট বেংক অৱ ইণ্ডিয়াই পুনৰ ফিক্সড ডিপ’জিট (এফ ডি)ৰ সুতৰ হাৰ হ্রাস কৰিলে ৷ বুধবাৰে বেংকটোৱে এই ঘোষণা কৰিছে ৷ ১০ মার্চৰ পৰা এই পৰিৱর্তিত সুতৰ হাৰ কার্যকৰী হ’ব ৷ ইয়াৰ পূর্বে যোৱা ১০ ফেব্রুৱাৰীত কম আৰু দীঘলীয়া সময়ৰ এফ ডিৰ সুতৰ হাৰ কমাইছিল ৷ পূর্বতে ৭ দিনৰ পৰা ৪৫ দিন পর্যন্ত ছর্ট টার্ম এফ ডিৰ সুতৰ হাৰ আছিল ৪.৫ শতাংশ ৷ পৰিৱর্তিত সুতৰ হাৰ অনুযায়ী এতিয়াৰ পৰা হ’ব ৪ শতাংশ৷ এনেদৰে এবছৰৰ পৰা ৫ বছৰৰ ভিতৰত সুতৰ হাৰ ৬ শতাংশৰ পৰা হ্রাস কৰি ৫.৯ শতাংশ কৰা হৈছে৷ আনহাতে, ৫ বছৰৰ পৰা ১০ বছৰ পর্যন্ত এফ ডিত সুতৰ হাৰ ৬ শতাংশৰ পৰা ৫.৯ শতাংশ কৰা হৈছে৷ জ্যেষ্ঠ নাগৰিকৰ ক্ষেত্রত ৭ দিনৰ পৰা ৪৫ দিনলৈকে এফ ডিৰ সুতৰ হাৰ ৪.৫ শতাংশ৷ ১ বছৰৰ পৰা ২ বছৰ পর্যন্ত সুতৰ হাৰ হ’ব ৬.৪ শতাংশ৷ আনহাতে, ৪৬ দিনৰ পৰা ১৭৯ দিন পর্যন্ত সুতৰ হাৰ হ’ব ৫.৫ শতাংশ৷ ইফালে, গৃহ ঋণৰ ক্ষেত্রতো বেংকটোৱে সুতৰ হাৰ হ্রাস কৰিছে৷ ৩০ বছৰীয়া গৃহ ঋণৰ ক্ষেত্রত ই এম আইত প্রতি এক লাখ টকাত ৭ টকাকৈ হ্রাস কৰিছে৷ আনহাতে, কাৰ লোনৰ ক্ষেত্রত সাত বছৰীয়া ঋণৰ ই এম আইত প্রতি ১ লাখত ৫ টকাকৈ সুতৰ হাৰ হ্রাস কৰিছে ৷