নিয়মীয়া বাৰ্তা ১৩ আগষ্টঃ ফ’বছৰ তালিকাত বলীউডৰ একমাত্র চেলিব্রিটী হিচাপে ১০গৰাকী শীর্ষ উপার্জনকাৰী অভিনেতাৰ ভিতৰত স্থান লাভ কৰিছে অক্ষয় কুমাৰে৷ বলীউডৰ অভিনেতাগৰাকীয়ে অৱশ্যে পূর্বেও এই তালিকাত অত্যধিক ধন উপার্জনকাৰী অভিনেতা হিচাপে প্রথম ১০টাৰ ভিতৰত স্থান লাভ কৰিবলৈ সক্ষম হৈছে৷ চলিত বর্ষত ফ’বছৰ এই তালিকাত ষষ্ঠ স্থানত আছিল অক্ষয় কুমাৰ৷ ৫২ বছৰীয়া ভাৰতীয় অভিনেতাগৰাকী পুৰুষৰ তালিকাত প্রথম ১০ৰ ভিতৰত ষষ্ঠ স্থান দখল কৰিছে ৪৮.৫ নিযুত ডলাৰ উপার্জনেৰে৷ অর্থাৎ ভাৰতীয় টকাৰ হিচাপত অক্ষয় কুমাৰৰ বর্ষটোৰ উপার্জন প্রায় ৩৫৯ কোটি ১২ লাখ৷ অৱশ্যে ২০১৯ৰ তালিকাতকৈ দুটা স্থান পিছ পৰিছে অক্ষয় কুমাৰ৷ ২০১৯ৰ বর্ষত ফ’বছৰ তালিকাত চতুর্থ স্থানত আছিল বলীউডৰ অভিনেতাগৰাকী৷ ২০২০ত এই তালিকাত শীর্ষস্থান দখল কৰিছে ৰেচলাৰ তথা অভিনেতা ডায়নে জনছনে৷ জনছনৰ মুঠ উপার্জন হৈছে ৮৭.৫ নিযুত ডলাৰ৷ যোৱাবছৰো শীর্ষস্থানত আছিল জনছন৷ ইফালে, ডেডপুলৰ তাৰকা ৰিয়ান ৰেইনল্ডছে ৭১.৫ নিযুত ডলাৰ উপার্জনেৰে দ্বিতীয় স্থান লাভ কৰিছে ফ’বছৰ এই তালিকাত৷ তালিকাত তৃতীয়, চতুর্থ আৰু পঞ্চম স্থান লাভ কৰিছে মার্ক ৱালবার্গ, বেন এফলেক আৰু ভিন ডিজেলে৷ ইফালে, হেমিলটনৰ তালিকাত লিন মানুৱেল মিৰান্দাই সপ্তম স্থান লাভ কৰাৰ বিপৰীতে উইল স্মিথ, আডাম ছেণ্ডলাৰ আৰু জেকি চানে ক্রমে অষ্টম, নৱম আৰু দশম স্থান লাভ কৰিছে এই তালিকাত