নিয়মীয়া বাৰ্তা, ১৯ নৱেম্বৰঃ ভাৰতৰ পৰা চীনলৈ ৰপ্তানি কৰা তিনি বিধ সামুদ্রিক মাছৰ পেকেজত ক’ৰোনা ভাইৰাছৰ উপস্থিতি ধৰা পৰাৰ পিছতে বেইজিং প্রশাসনে এই ক্ষেত্রত কঠোৰ ব্যৱস্থা গ্রহণ কৰিছে৷ ভাৰতৰ পৰা দক্ষিণ চীনলৈ ৰপ্তানি হোৱা এই সামুদ্রিক মাছত ধৰা পৰিছে ক’ভিড–১৯ৰ উপস্থিতি৷
কালি চীনৰ শুল্ক বিভাগে এই তথ্য সদৰী কৰিছে৷ লক্ষণীয়ভাৱে ভাৰতৰ এটা কোম্পানীৰ পৰা চীনলৈ ৰপ্তানি কৰা সামুদ্রিক মাছ ইতিমধ্যে নিষিদ্ধ কৰা হৈছে দেশখনত৷ অৱশ্যে এতিয়ালৈকে এই সামুদ্রিক মাছৰ পৰা চীনত কোনো লোক ক’ভিড–১৯ত আক্রান্ত হোৱাৰ তথ্য সদৰী কৰা নাই দেশখনে৷
কিন্তু চলিত মাহৰ আৰম্ভণিতে জার্মানীৰ এটা কোম্পানীয়ে দেশখনলৈ ৰপ্তানি কৰা গাহৰিৰ মাংসৰ পেকেজত ধৰা পৰিছিল ক’ভিড–১৯ৰ উপস্থিতি৷ বেইজিঙৰ সমীপৰ টিয়ানজিন চহৰত এই গাহৰিৰ মাংসৰ দ্বাৰা ক’ভিডত সংক্রমিত হৈছিল এজন লোক৷