নিয়মীয়া বাৰ্তা, ১৯ ছেপ্টেম্বৰঃ চৰকাৰী হওক বা বেচৰকাৰী হওক, কর্মক্ষেত্রত আজিও লিংগ বৈষম্যৰ চিকাৰ হৈ আছে মহিলাসকল৷ পুৰুষৰ আধিপত্য যে বেতন বৈষম্যতো আছে সেয়া আন্তর্জাতিক শ্রম সংস্থা (আইএলঅ’)ৰ এক প্রতিবেদনত পোহৰলৈ আহিছে৷ এই প্রতিবেদনত উল্লেখ কৰা অনুসৰি বিশ্বৰ প্রতিখন দেশতে কর্মক্ষেত্রত লিংগ বৈষম্যৰ চিকাৰ হ’বলগীয়া হৈছে মহিলাসকল৷
উল্লেখনীয় যে আজি সমবেতন দিৱস (ইকুৱেল পে’ ডে’) পালন কৰা হৈছে বিশ্বজুৰি৷ বেতন বৈষম্য দূৰীকৰণ অভিযান আজিৰে পৰা আৰম্ভ কৰিছে লিংগ সাম্য আৰু নাৰীৰ ক্ষমতাক লৈ কাম কৰা ৰাষ্ট্রসংঘৰ নিজস্ব সংগঠন ‘ইউ উইমেন’–এ৷ আইএল’ৰ প্রতিবেদন অনুসৰি বিশ্বজুৰি কর্মক্ষেত্রত মহিলাসকলে পুৰুষৰ তুলনাত প্রায় ২০ শতাংশ কম উপার্জন কৰে৷ বিভিন্ন সমীক্ষাৰ প্রতিবেদনতো উল্লেখ পাইছে যে কেৱল লিংগ বৈষম্যৰ বাবে কর্মক্ষেত্রত মহিলা আৰু পুৰুষসকলৰ উপার্জনৰ ক্ষেত্রত বৃহৎ ব্যৱধানৰ সৃষ্টি হৈছে৷ গতিকে ইয়াক দূৰীকৰণৰ দাবী জনাইছে আইএলঅ’–এ৷