নিয়মীয়া বাৰ্তা, ২৬ নৱেম্বৰঃ ঘাতক ক’ভিড–১৯ৰ সংক্রমণ অব্যাহত থকা বাবেই এই মহামাৰী প্রতিৰোধৰ বাবে নিৰীক্ষণ, কনটেইনমেণ্ট আৰু সাৱধানতাক প্রাধান্য দি নতুন নির্দেশনা জাৰি কৰিছে কেন্দ্রীয় গৃহ মন্ত্রালয়ে৷ অহা ৩০ নৱেম্বৰত আনলক ৬.০ৰ নির্দেশনা সমাপ্ত নোহোৱাৰ পূর্বেই কালি নতুন নির্দেশনা কেন্দ্রীয় গৃহ মন্ত্রালয়ে জাৰি কৰিলেও নতুনকৈ একো সন্নিৱিষ্ট কৰা নাই৷ অহা ১ ডিচেম্বৰৰ পৰা ৩১ ডিচেম্বৰলৈ বলৱৎ থাকিবলগীয়া এই নতুন নির্দেশনা আনলক–৬.০ৰ দৰেই বাহাল থাকিব বুলি স্পষ্ট কৰি দি পূর্বৰ দৰেই কনটেইনমেণ্ট জ’নত কঠোৰভাৱে লকডাউন বলৱৎ থাকিব বুলি নির্দেশনাত উল্লেখ কৰা হৈছে৷
তদুপৰি ক’ভিড–১৯ সংক্রমণৰ প্রতি লক্ষ্য ৰাখি নৈশ সান্ধ্য আইন বলৱৎ কৰাৰ কর্তৃত্ব ৰাজ্য চৰকাৰৰ হাতত এৰি দিছে৷ কনটেইনমেণ্ট জ’নত কেৱল অত্যাৱশ্যকীয় সেৱাৰ কার্যকলাপহে চলি থাকিব৷ কনটেইনমেণ্ট জ’ন ঘোষণা কৰাৰ ক্ষেত্রত ৰাজ্য আৰু কেন্দ্রীয়শাসিত অঞ্চলসমূহত অধিক সজাগ হ’বলৈ নির্দেশনা প্রকাশ কৰাৰ লগতে কেন্দ্রীয় স্বাস্থ্য আৰু পৰিয়াল কল্যাণ বিভাগৰ সকলো নির্দেশনা মানি চলিব লাগিব৷
ক’ভিড–১৯ প্রট’কল সঠিকভাৱে মানি চলাৰ লগতে আনলক–৬.০ত মুকলি কৰি দিয়া সকলো কার্যকলাপত এছ অ’ পি কঠোৰভাৱে মানি চলিব লাগিব বুলিও নতুন নির্দেশনাত উল্লেখ কৰা হৈছে৷ কনটেইনমেণ্ট জ’নৰ বাহিৰত চলি থকা সকলো অর্থনৈতিক কার্যকলাপৰ ক্ষেত্রত পূর্বে দিয়া এছ অ’ পি কর্তৃপক্ষই কঠোৰভাৱে মানি চলাটো বাধ্যতামূলক৷ আনপিনে স্থানীয় পৰিস্থিতিৰ প্রতি লক্ষ্য ৰাখি ৰাজ্য আৰু কেন্দ্রীয়শাসিত অঞ্চলসমূহে নিজাববীয়াকৈ প্রতিবন্ধকতা জাৰি কৰিব পাৰিব৷ পূর্বৰ দৰেই ৬৫ বছৰৰ ঊর্ধ্বৰ ব্যক্তি আৰু ১০ বছৰ অনূর্ধ্বৰ শিশুৰ ক্ষেত্রত প্রতিবন্ধকতা বাহাল থাকিব৷ অতি অত্যাৱশ্যকীয় প্রয়োজনৰ বাহিৰে এনে লোক বাহিৰলৈ ওলোৱাত প্রতিবন্ধকতা আছে৷