নিয়মীয়া বাৰ্তা, ২৫ এপ্ৰিলঃ অতি বিপজ্জনক আৰু ভয়াৱহ হৈছে দেশৰ ক’ভিড পৰিস্থিতি৷ ক’ভিড–১৯ ইমানেই তীব্রতাৰে সংক্রমিত হৈছে যে দেশজুৰি আক্রান্তৰ সংখ্যা বিগত তিনি দিন ধৰি ৩ লক্ষাধিক হৈছে৷ যোৱা ২৪ ঘণ্টাত ৩.৪৬ লক্ষাধিক লোক আক্রান্ত হোৱাত তিনি দিনতে প্রায় ১০ লাখ লোক ঘাতক ক’ভিড–১৯ত আক্রান্ত হৈছে৷ যোৱা ২১ এপ্রিলত বিশ্বৰ প্রথম দেশ হিচাপে ভাৰতত ৩ লক্ষাধিক লোক আক্রান্ত হোৱাৰ পিছত ২২ এপ্রিলত আক্রান্তৰ সংখ্যা বৃদ্ধি হৈ ৩.৩৪ লক্ষাধিকলৈ বৃদ্ধি পায়৷ যোৱা ২৪ ঘণ্টাত অর্থাৎ ২৩ এপ্রিলত ইয়াৰ সংখ্যা বৃদ্ধি হৈ এদিনত পুনৰ অনাকাংক্ষিতভাৱে ৩,৪৬,৭৮৬জন আক্রান্ত হয়৷ এপ্রিল মাহত আক্রান্তৰ সংখ্যা প্রায় ৪০ লাখ হোৱাত দেশজুৰি আক্রান্তৰ সংখ্যা ১.৬৬ কোটিৰ অধিক হৈছে৷
ইপিনে যোৱা ২৪ ঘণ্টাত ২,৬২৪জন লোকৰ প্রাণহানি ঘটাত মৃতকৰ সংখ্যা ১৮,৯৫,৪০০জনলৈ বৃদ্ধি পাইছে৷ কেন্দ্রীয় স্বাস্থ্য মন্ত্রালয়ৰ তথ্য অনুসৰি বর্তমান দেশত ২৫,৫৩,৯৪০ ক’ভিড ৰোগী চিকিৎসাধীন হৈ আছে৷ চলিত বর্ষৰ ক’ৰোনা মহামাৰীত সর্বাধিক ক্ষতিৰ সন্মুখীন হৈছে মহাৰাষ্ট্র৷
বিগত বর্ষতো মহাৰাষ্ট্রত সর্বাধিক আক্রান্ত হোৱাৰ লগতে সর্বাধিক ক’ভিড ৰোগীৰ মৃত্যু ঘটিছে৷ মহাৰাষ্ট্রত ক’ভিড–১৯সৃষ্ট পৰিৱেশ ইমানেই ভয়াৱহ যে হাস্পতালে হাস্পতালে মৃত্যুৰ কিৰীলি৷ চিকিৎসালয়ত ক’ভিড ৰোগীৰ বাবে স্থানৰ অভাৱ৷ এনে এক পৰিস্থিতিও দেখা গৈছে যে চিকিৎসালয়ৰ চৌহদৰ লগতে বাহিৰতো ৰোগী পৰি আছে৷ যোৱা ২৪ ঘণ্টাত ৰাজ্যখনত আক্রান্ত হৈছে ৬৬,৮৩৬জন, মৃত্যু ঘটিছে ৭৭৩জনৰ৷
ইপিনে, দেশৰ ৰাজধানী দিল্লীতো ঘাতক ক’ভিডে সংহাৰী ৰূপ লৈছে৷ যোৱা ২৪ ঘণ্টাত ২৪,৩৩১জন লোক আক্রান্ত হোৱাৰ বিপৰীতে ৩৪৮জনে প্রাণ হেৰুৱাইছে৷ উত্তৰ প্রদেশত যোৱা ২৪ ঘণ্টাত আক্রান্ত হৈছে ৩৬,৬০৫, কেৰালাত ২৮,৪৪৭, কর্ণাটকত ২৬,৯৬২জন৷
মন কৰিবলগীয়া যে এই পাঁচখন ৰাজ্যত সম্প্রতি দেশত আক্রান্তৰ ভিতৰত ৫২.৮২ শতাংশ ৰোগী আছে৷ মহাৰাষ্ট্রত অকলেই মুঠ আক্রান্তৰ ভিতৰত ১৯.২৭ শতাংশ৷