তেলেংগানা আৰু অন্ধ্ৰপ্ৰদেশৰ ভোটাৰসকলৰ বাবে গুৰুত্বপূৰ্ণ খবৰ। ১ এপ্ৰিলৰ পৰা দুয়োখন ৰাজ্যত আৰম্ভ হ’ব বিশেষ ভোটাৰ তালিকা পুনঃপৰীক্ষা (SIR) প্ৰক্ৰিয়া, যি ২০২৬ চনৰ মে’ মাহলৈ চলিব। এই প্ৰক্ৰিয়াৰ অধীনত ঘৰে ঘৰে গৈ ভোটাৰ তালিকা পৰীক্ষা কৰা হ’ব।
এই অভিযানত মৃত ব্যক্তিৰ নাম বাদ দিয়া, ডুপ্লিকেট নাম আঁতৰোৱা আৰু নতুন যোগ্য ভোটাৰ অন্তৰ্ভুক্ত কৰাৰ ব্যৱস্থা কৰা হ’ব। কিন্তু আটাইতকৈ গুৰুত্বপূৰ্ণ বিষয়টো হৈছে—প্ৰত্যেক ভোটাৰে নিজৰ নাম ২০০২ চনৰ ভোটাৰ তালিকাৰ সৈতে সংযোগ কৰিব লাগিব, যাক “লীগেচি লিংকেজ” বুলি কোৱা হৈছে। এই ব্যৱস্থাই বহু লোকৰ মাজত উদ্বেগ সৃষ্টি কৰিছে।
এই পৰিস্থিতিৰ প্ৰতি লক্ষ্য ৰাখি আছাদুদ্দিন ওৱেইছীৰ নেতৃত্বত AIMIM দলে হায়দৰাবাদত অৱস্থিত দাৰুস্ছালাম কাৰ্যালয়ত এটা বিশেষ হেল্প ডেস্ক আৰম্ভ কৰিছে। এই হেল্প ডেস্কে নাগৰিকসকলক— ভোটাৰ তালিকাত নিজৰ নাম পৰীক্ষা কৰা, ভুল তথ্য শুধৰণি কৰা, নতুন নাম অন্তৰ্ভুক্ত কৰা ইত্যাদি ক্ষেত্ৰত সহায় আগবঢ়াব।
প্ৰতিদিনে পুৱা ১০:৩০ বজাৰ পৰা আবেলি ৪ বজালৈকে এই সেৱা উপলব্ধ থাকিব। সহায়ৰ বাবে 9100043150, 9100043151 আৰু 9100043152 নম্বৰত যোগাযোগ কৰিব পাৰিব।
দেশৰ আন ৰাজ্যসমূহতো এই ধৰণৰ SIR প্ৰক্ৰিয়াই ইতিমধ্যে বিতৰ্কৰ সৃষ্টি কৰিছে। বিশেষকৈ পশ্চিমবঙ্গত ২০০২ চনৰ তালিকাৰ সৈতে সংযোগ বাধ্যতামূলক কৰাৰ বাবে বহু লোক উদ্বিগ্ন হৈ পৰিছিল। বিৰোধী দলসমূহে অভিযোগ কৰিছে যে এই প্ৰক্ৰিয়াৰ জৰিয়তে বহু প্ৰকৃত ভোটাৰ তালিকাৰ পৰা বাদ পৰাৰ আশংকা আছে।
তেলেঙ্গানাত বহু প্ৰব্ৰজক শ্রমিক, বয়োজ্যেষ্ঠ আৰু পিছপৰা শ্ৰেণীৰ লোক আছে, যিসকলে ২০০২ চনৰ তালিকাৰ সৈতে নিজৰ সংযোগ প্ৰমাণ কৰাত সমস্যাৰ সন্মুখীন হ’ব পাৰে। মুখ্য নিৰ্বাচনী বিষয়া সি. সুদৰ্শন ৰেড্ডীয়ে ইতিমধ্যে ৫০জন নিবন্ধন বিষয়াক প্ৰশিক্ষণ প্ৰদান কৰিছে, কিন্তু সাধাৰণ ৰাইজৰ মাজলৈ এই তথ্য প্ৰেৰণ এতিয়াও এক ডাঙৰ প্ৰত্যাহান হৈ আছে। সেয়ে যদি আপোনাৰ নাম ভোটাৰ তালিকাত আছে বুলি ভাবিছে, তেন্তে এবাৰ নিশ্চিতভাৱে পৰীক্ষা কৰক। ভুল থাকিলে বা নাম নাথাকিলে ১ এপ্ৰিলৰ আগতে প্ৰস্তুত হওক।
ডিজিটেল ডেস্ক, ২১ মাৰ্চ