বংগত হিংসা-প্ৰতিশোধৰ ৰাজনীতিৰ অন্ত হ’ব- কলকাতাত TMC-ক আক্রমণ গৃহমন্ত্ৰীৰ

কেন্দ্ৰীয় গৃহমন্ত্ৰী অমিত শ্বাহে কলকাতাত এখন প্ৰেছ কনফাৰেন্স সম্বোধন কৰে। এই সময়ছোৱাত তেওঁ সকলোকে আদৰণি জনাই কয় যে আজি দিনটো সকলো ভাৰতীয়ৰ বাবে গৌৰৱৰ দিন। ১৯৪৩ চনৰ আজিৰ দিনটোতেই নেতাজী সুভাষ চন্দ্ৰ বসুৱে প’ৰ্টব্লেয়াৰত ভাৰতীয় ত্ৰিৰংগা উত্তোলন কৰিছিল বুলি তেওঁ স্মৰণ কৰে।

অমিত শ্বাহে কয় যে অহা এপ্ৰিল মাহত পশ্চিমবংগত বিধানসভা নিৰ্বাচন অনুষ্ঠিত হ’ব। বিগত ১৫ বছৰত টিএমচিৰ শাসনকালত বংগত ভয়, দুৰ্নীতি আৰু কুশাসনৰাজ চলি আহিছে বুলি কটাক্ষ কৰি তেওঁ কয় যে ইয়াৰ ফলত সাধাৰণ জনতা আতংকিত আৰু ভীতিগ্ৰস্ত হৈ আছে।

তেওঁ কয় যে এতিয়া এপ্ৰিললৈকে সময়খিনি বংগবাসীৰ বাবে অতি গুৰুত্বপূৰ্ণ। জনতাই ভয়মুক্ত আৰু কুশাসনমুক্ত চৰকাৰ গঢ়িবলৈ সাজু হৈছে। অমিত শ্বাহে আশ্বাস দিয়ে যে প্ৰধানমন্ত্ৰী নৰেন্দ্ৰ মোদীৰ নেতৃত্বত বংগত বিজেপিৰ চৰকাৰ গঠিত হ’লে উন্নয়নৰ গংগা ব’ব। লগতে তেওঁ কয় যে বংগত অনুপ্ৰৱেশ ৰোধ কৰিবলৈ বিশেষ গ্ৰীড ব্যৱস্থা গঢ়ি তোলা হ’ব আৰু অনুপ্ৰৱেশকাৰীক বাছি বাছি বাহিৰলৈ পঠিওৱা হ’ব।

অমিত শ্বাহে কয় যে ১৫ এপ্ৰিল ২০২৬ৰ পাছত বিজেপিৰ চৰকাৰ গঠিত হ’লে বংগত পুনৰ্জাগৰণৰ সূচনা হ’ব। তেওঁ দাবী কৰে যে ২০২৬ৰ বিধানসভা নিৰ্বাচনত বিজেপিয়ে দুই-তৃতীয়াংশ সংখ্যাগৰিষ্ঠতাৰে চৰকাৰ গঠন কৰিব।

অমিত শ্বাহে বিজেপিৰ পূৰ্বৱৰ্তী নিৰ্বাচনী প্ৰদৰ্শনৰ কথাও উল্লেখ কৰে। ২০১৪ৰ লোকসভা নিৰ্বাচনত বিজেপিয়ে ১৭ শতাংশ ভোট আৰু ২খন আসন লাভ কৰিছিল। ২০১৭ৰ বিধানসভা নিৰ্বাচনত ১০ শতাংশ ভোট আৰু ৩খন আসন লাভ কৰে। ২০১৯ৰ লোকসভা আৰু ২০২১ৰ বিধানসভা নিৰ্বাচনত বিজেপি মুখ্য বিৰোধী দলৰ স্থানত অৱতীৰ্ণ হয়। ২০২৪ৰ লোকসভা নিৰ্বাচনত বিজেপিয়ে ৩৯ শতাংশ ভোট আৰু ১২খন আসন লাভ কৰে।

অমিত শ্বাহে মমতা চৰকাৰক অনুপ্ৰৱেশ ৰোধ কৰাত ব্যৰ্থ হোৱা বুলি অভিযোগ তোলে। তেওঁ কয় যে অনুপ্ৰৱেশ এতিয়া ৰাষ্ট্ৰীয় সুৰক্ষাৰ বিষয় হৈ পৰিছে আৰু ইয়াক কেৱল বিজেপিয়েই ৰোধ কৰিব পাৰে।

তেওঁ মমতা চৰকাৰৰ বিৰুদ্ধে গুৰুতৰ দুৰ্নীতিৰ অভিযোগ উত্থাপন কৰে। তেওঁ কয় যে মন্ত্ৰী আৰু নেতাসকলৰ ঘৰত কোটি কোটি টকা উদ্ধাৰ হৈছে, কিন্তু কোনো জবাবদিহিতা নাই। নাৰীৰ সুৰক্ষাক এক গুৰুত্বপূৰ্ণ বিষয় বুলি উল্লেখ কৰি অমিত শ্বাহে কয় যে মাতৃ, ভগ্নী আৰু কন্যাসকল অসুৰক্ষাৰ অনুভৱত ক্লান্ত হৈ পৰিছে।

অমিত শ্বাহে কয় যে বংগৰ GDP-ত অৱদান তৃতীয় স্থানৰ পৰা ২২তম স্থানলৈ হ্ৰাস পাইছে। দুৰ্নীতি, অনুপ্ৰৱেশৰ বাবে সকলো উন্নয়নমূলক আঁচনি স্থবিৰ হৈ পৰিছে বুলি তেওঁ অভিযোগ কৰে। তেওঁ কয় যে মমতা চৰকাৰে জনস্বাৰ্থ উপেক্ষা কৰিছে আৰু এতিয়া চৰকাৰৰ পতন নিশ্চিত।

বিজেপি নেতা অমিত শ্বাহে কয় যে বংগত ছিণ্ডিকেট ৰাজ চলি আছে আৰু পৰিৱেশ শত্রুতাপূৰ্ণ। তেওঁ অভিযোগ কৰে যে মমতা বেনাৰ্জীৰ শাসনত আয়ৰ অংশ দিবলৈ বাধ্য কৰা হয় আৰু DGP নিযুক্তিতো ইচ্ছামতে সিদ্ধান্ত লোৱা হয়।

তেওঁ আৰু কয় যে বংগত বিজেপি কৰ্মীসকলক হত্যা কৰা হৈছে। দুৰ্নীতি, অনুপ্ৰৱেশৰ বাবে চৰকাৰী আঁচনিসমূহ বন্ধ হৈ আছে। দেশৰ আন ৰাজ্যত গৰিবসকলে ৫ লাখ টকালৈ বিনামূলীয়া চিকিৎসা সুবিধা লাভ কৰিলেও বংগত এই সুবিধা দিয়া হোৱা নাই বুলি তেওঁ উল্লেখ কৰে।

অমিত শ্বাহে কয় যে বংগত হিংসা আৰু প্ৰতিশোধৰ ৰাজনীতি শীঘ্ৰেই অন্ত পৰিব। এতিয়ালৈকে ৩০০ বিজেপি কৰ্মী নিহত হৈছে আৰু ৩০০০ৰো অধিক কৰ্মী গৃহহীন জীৱন যাপন কৰিবলৈ বাধ্য হৈছে। লগতে তেওঁ কয় যে টিএমচি চৰকাৰ সদায় কেন্দ্ৰবিৰোধী মনোভাৱ লৈ কাম কৰি আহিছে।

ডিজিটেল ডেস্ক, ৩০ ডিচেম্বৰ