আজি ঘোষিত উচ্চতৰ মাধ্যমিক চূড়ান্ত বর্ষৰ পৰীক্ষাৰ ফলাফলত দেৰগাঁৱৰ মিছামৰা মৌজাৰ দুলীয়াগাঁৱৰ মেধাৱী ছাত্র স্বপ্ননীল বৰাই কলা শাখাত মিছামৰা উচ্চতৰ মাধ্যমিক বিদ্যালয়ৰ পৰা উত্তীর্ণ হৈ অঞ্চলটোলৈ গৌৰৱ কঢ়িয়াই আনিছে৷
স্বপ্ননীলে ইংৰাজীত ৭০, অসমীয়াত ৮৫, বুৰঞ্জীত ৮৩, ভূগোলত ৭৫, স্বদেশ অধ্যয়নত ৬৫, ৰাজনীতি বিজ্ঞান বিষয়ত ৬৪ নম্বৰ লাভ কৰি সর্বমুঠ ৩৭৮ নম্বৰ লাভ কৰিবলৈ সক্ষম হৈছে৷
স্বপ্ননীলে মেট্রিক পৰীক্ষাত অসমীয়া আৰু বিজ্ঞান বিষয়ত লেটাৰ লাভ কৰি প্রথম বিভাগত উত্তীর্ণ হৈ মেধাৰ পৰিচয় দিছিল৷ স্বপ্ননীলে জন্মৰ মাত্র এবছৰ বয়সতে পিতৃ ৰাজামোহন বৰাক শিৱসাগৰত সংঘটিত এক ভয়ংকৰ দুর্ঘটনাত চিৰদিনৰ বাবে হেৰুৱাইছিল৷ তেতিয়াৰে পৰা মাতৃ বিনীতা নেওগ বৰাই বহু কষ্টৰে অর্থ উপার্জন কৰি স্বপ্ননীলক পঢ়া–শুনোৱাৰ লগতে ডাঙৰ–দীঘল কৰি আহিছে৷
স্বপ্ননীলে পঢ়া–শুনাৰ লগতে দেৰগাঁৱৰ লগতে যোৰহাটৰ বিভিন্ন স্থানত ভাওনাত অভিনয় কৰি দর্শকৰ মন জয় কৰিবলৈ সক্ষম হৈছে৷
ডিজিটেল ডেস্ক, ২৮ এপ্রিল