নিয়মীয়া বাৰ্তা, ১২ মার্চঃ ঘৰুৱা দল টীম ইণ্ডিয়া আৰু দক্ষিণ আফ্রিকাৰ মাজৰ তিনিখনীয়া এদিনীয়া মেচৰ শৃংখলাটো আজিৰ পৰা আৰম্ভ হ’ব ৷ ধৰমশালাত শৃংখলাটোৰ প্রথমখন মেচ অনুষ্ঠিত হ’ব ৷ নিউজিলেণ্ডত খেলা এদিনীয়া শৃংখলাটোত শোচনীয়ভাৱে পৰাস্ত হোৱাৰ পিছত বিৰাট কোহলি নেতৃত্বাধীন টীম ইণ্ডিয়াই আজিৰ পৰা প্রটিয়াজ বাহিনীৰে আৰম্ভ হ’বলগীয়া এদিনীয়া শৃংখলাটোত নতুনকৈ আৰম্ভণি কৰাৰ লক্ষ্য লৈছে ৷ অৱশ্যে আলহী দলটোক সহজভাৱে ল’ব বিচৰা নাই টীম ইণ্ডিয়াই ৷ অৱশ্যে এই শৃংখলাটোত অলৰাউণ্ডাৰ হার্দিক পাণ্ডিয়াৰ লগতে শিখৰ ধাৱনৰ প্রত্যাৱর্তনে ঘৰুৱা দলটোৰ আত্মবিশ্বাস বহুখিনি বৃদ্ধি কৰি তুলিব ৷ পিঠিৰ আঘাতৰ পৰা সম্পূর্ণৰূপে আৰোগ্য লাভ কৰা পাণ্ডিয়াই ডি ৱাই পাটিল কর্পোৰেট কাপত দুর্দান্ত বেটিঙেৰে ফর্মত থকাৰ ইংগিত দিছে ৷ আনহাতে, তাৰকা পেচ বলাৰ ভুবনেশ্বৰ কুমাৰো ভাৰতীয় দলটোলৈ উভতি আহিছে৷ ভুবনেশ্বৰৰ প্রত্যাৱর্তনেও দলটোৰ বলিং শক্তি বহু পৰিমাণে বৃদ্ধি কৰি তুলিব ৷ ইফালে, এই শৃংখলাটোত দক্ষিণ আফ্রিকাক সহজভাৱে ল’ব বিচৰা নাই বুলি উল্লেখ কৰি অধিনায়ক কোহলিয়ে কয় যে এই শৃংখলাটোত দুর্দান্ত প্রদর্শন দাঙি ধৰি নিউজিলেণ্ডৰ ব্যর্থতা পাহৰাৰ লক্ষ্য লৈছোঁ৷ পাণ্ডিয়া আৰু ধাৱনৰ লগতে ভুবনেশ্বৰৰ প্রত্যাৱর্তনে ভাৰতীয় দলটোৰ আত্মবিশ্বাস বহুখিনি বৃদ্ধি কৰি তুলিব বুলি কোহলিয়ে কয়৷ আনহাতে, এদিনীয়া শৃংখলাটোক লৈ আত্মবিশ্বাসী নৱাগত খেলুৱৈৰে সমৃদ্ধ দক্ষিণ আফ্রিকা দলটো ৷ শৃংখলাটোত ভাৰতৰ প্রত্যাহ্বান গ্রহণ কৰিবলৈ সম্পূর্ণৰূপে সাজু আছে দলটো ৷