২০২৬ টি-২০ বিশ্বকাপত অভিষেক শৰ্মা এতিয়ালৈ তিনিওটা ইনিংছতেই ‘শূন্য’ ৰানত আউট হৈছে। এই দুৰ্বল ফৰ্মৰ ফলত দলীয় পৰিচালনাই তেওঁক প্লেইং ইলেভেনৰ পৰা বাদ দিব পাৰে বুলি আলোচনা জোৰদাৰ হৈছে। ছুপাৰ-৮ পৰ্যায়ত ভাৰতৰ প্ৰথম খেলখন ২২ ফেব্ৰুৱাৰীত দক্ষিণ আফ্ৰিকাৰ বিৰুদ্ধে অনুষ্ঠিত হ’ব। তাৰ পূৰ্বে টীম ইণ্ডিয়াৰ বলিং কোচ মৰ্ণে মর্কেলে স্পষ্টকৈ মত প্ৰকাশ কৰিছে।
শুকুৰবাৰে অনুষ্ঠিত সংবাদ মেলত ভাৰতীয় ক্ৰিকেট দলৰ বলিং কোচ মৰ্ণে মর্কেলে কয়, “অভিষেক শৰ্মাক বাদ দিয়াৰ বিষয়ে কোনো আলোচনা হোৱা নাই। আমি বিশ্বাস কৰোঁ তেওঁ ভাল প্ৰদৰ্শন কৰিব। নেটত তেওঁ বল ভালকৈ মাৰিছে, নিশ্চয়েই উভতি আহিব।”
টি-২০ বিশ্বকাপ কেরিয়াৰৰ আৰম্ভণিতে অভিষেক শৰ্মাই এক অদ্ভুত ৰেকৰ্ড স্থাপন কৰিছে। প্ৰথমে আমেৰিকা, তাৰ পিছত পাকিস্তান আৰু নেদাৰলেণ্ডছৰ বিৰুদ্ধেও তেওঁ কোনো ৰান নকৰাকৈ আউট হৈছিল। জনোৱা হৈছিল যে আমেৰিকাৰ বিৰুদ্ধে খেলখনত অসুস্থ হৈ থাকিও তেওঁ বেটিং কৰিবলৈ নামিছিল। তাৰ পিছত অসুস্থতাৰ বাবে নামিবিয়াৰ বিৰুদ্ধে খেলিব নোৱাৰিলে। উভতি অহাৰ পিছতো দুয়োখন খেলত ভাগ্য তেওঁৰ পক্ষে নাছিল।
এই বছৰ অভিষেক শৰ্মাই অতি দুৰ্বল ফৰ্মৰ সৈতে সংগ্ৰাম কৰি আছে। যোৱা ৭টা টি-২০ ইনিংছৰ ভিতৰত ৫বাৰেই তেওঁ ‘শূন্য’ ৰানত আউট হৈছে। এই বছৰ ৮টা ইনিংছত তেওঁ মুঠ ১৮২ ৰান সংগ্ৰহ কৰিছে। ৫টা ইনিংছত কোনো ৰান কৰিব নোৱাৰিলেও বাকী ৩টা ইনিংছত ২টা অৰ্ধশতকসহ ১৮২ ৰান সংগ্ৰহ কৰিছে। তেওঁৰ এই বছৰৰ ষ্ট্ৰাইক ৰেট এতিয়াও ২২৪ৰ ওপৰত আছে।
ডিজিটেল ডেস্ক, ২১ ফেব্ৰুৱাৰী