বিশেষ বাৰ্তা, ২৮ জুনঃ ২০১১ চনত শচীন তেণ্ডুলকাৰৰ বাবে বিশ্বকাপ জয় কৰিবলৈ বিচাৰিছিল টীম ইণ্ডিয়াই৷ মহেন্দ্র সিং ধোনী নেতৃত্বাধীন ভাৰতীয় দলটোৱে সেইবাৰ বিশ্বকাপ জয় কৰি উপহাৰ স্বৰূপে আগবঢ়াইছিল তেণ্ডুলকাৰলৈ ৷ এইবাৰ বিৰাট কোহলিৰ প্রতি একেই হেঁপাহ দেখিবলৈ বিচাৰিছে টীম ইণ্ডিয়াৰ প্রাক্তন অপেনাৰ বীৰেন্দৰ সেহৱাগে ৷ আসন্ন এদিনীয়া বিশ্বকাপৰ দিন চমু চাপি অহাৰ সময়ত ২০১১ চনৰ বিশ্বকাপ বিজয়ী ভাৰতীয় দলটোৰ অন্যতম সদস্য সেহৱাগে ৰোহিত শর্মা নেতৃত্বাধীন ভাৰতীয় দলটোলৈ এক বার্তা আগবঢ়াইছে যে দলটোৱে কোহলিৰ কাৰণে বিশ্বকাপ জয় কৰক৷ এক সংবাদ প্রতিষ্ঠানৰ সৈতে হোৱা বার্তালাপত সেহৱাগে কয় যে আমি ২০১১ চনৰ বিশ্বকাপ শচীনৰ বাবে খেলিছিলোঁ ৷ দলটোৱে সর্বস্ব উজাৰি খেলিছিল আৰু ক্রিকেটৰ ভগৱানগৰাকীক বিশ্বকাপৰ খিতাপ জয়ৰ সোৱাদ দিছিল ৷ এইবাৰ বিৰাট কোহলি শচীন তেণ্ডুলকাৰৰ স্থানত ৷ ৰোহিত বাহিনীয়ে উজ্জীৱিত খেল দাঙি ধৰি প্রতিযোগিতাখনৰ ট্রফী কোহলিৰ হাতত গতাই দিয়ে যেন৷ কোহলিয়ে সদায় সর্বস্ব উজাৰিয়ে খেলে বুলি উল্লেখ কৰি সেহৱাগে কয় যে এইবাৰ বিশ্বকাপ জয়ৰ বাবে তাৰকা বেটাৰগৰাকীয়ে হাহাকাৰ কৰিব ৷ আশা কৰিছোঁ প্রতিযোগিতাখনত কোহলিয়ে বেটত অধিক ৰান পাব ৷ ১৫ অক্টোবৰত পাকিস্তানৰ বিপক্ষে খেলিবলগীয়া হাইভল্টেজ মেচখনত ভাৰতক ফেভাৰিট হিচাপে আখ্যা দি সেহৱাগে কয় যে ভাৰতে পাকিস্তান দলটোৰ চাপ ভালদৰে চম্ভালিব পাৰিব আৰু সেইবাবেই ঘৰুৱা দলটোৱে মেচখনত জয়লাভ কৰিব পাৰিব ৷