নিয়মীয়া বাৰ্তা, ২৩ ফেব্ৰুৱাৰীঃ চলিত বর্ষৰ জুনত ক্রিকেটৰ মক্কা লর্ডছত অনুষ্ঠিত হ’বলগীয়া বিশ্ব টেষ্ট চেম্পিয়নশ্বিপৰ ফাইনেলত স্থান সুৰক্ষিত কৰাৰ লক্ষ্যৰে তৃতীয় টেষ্টলৈ সাজু হৈছে ভাৰত আৰু ইংলেণ্ড৷ বুধবাৰৰ পৰা দুয়োটা দলে আহমেদাবাদত নতুনকৈ নির্মাণ হৈ উঠা বিশ্বৰ সর্ববৃহৎ চর্দাৰ পেটেল ক্রিকেট ষ্টেডিয়ামত শৃংখলাৰ তৃতীয় তথা প্রথমখন গুলপীয়া বলৰ টেষ্ট মেচত অৱতীর্ণ হ’ব৷ দুয়োটা দলে এখনকৈ মেচত জয়েৰে শৃংখলাত সমতা স্থাপন কৰি থকা অৱস্থাত ভাৰত আৰু ইংলেণ্ডৰ প্রধান লক্ষ্য হ’ল টেষ্ট শৃংখলাত অগ্রগতি অর্জনৰ লগতে বিশ্ব টেষ্ট চেম্পিয়নশ্বিপৰ ফাইনেললৈ উন্নীত হোৱা৷
উল্লেখ্য যে টেষ্ট ক্রিকেটৰ বিশ্বকাপ হিচাপে পৰিগণিত বিশ্ব টেষ্ট চেম্পিয়নশ্বিপৰ ফাইনেলত প্রৱেশৰ বাবে ভাৰতে শৃংখলাটোত অতি কমেও এখন মেচত জয়ী হোৱাৰ লগতে আনখনত অপৰাজিত হৈ থাকিব লাগিব৷ একেদৰে ফাইনেলৰ আশা জীয়াই ৰাখিবলৈ ইংলেণ্ডক দুয়োখন মেচতে জয়ৰ প্রয়োজন৷ ভাৰতৰ তুলনাত ইংলেণ্ডৰ বাবে বিশ্ব টেষ্ট চেম্পিয়নশ্বিপৰ ফাইনেলৰ পথ অধিক কঠিন যদিও জ’ ৰুট নেতৃত্বাধীন দলটোৱে প্রথম টেষ্টত শক্তিশালী টীম ইণ্ডিয়াক পৰাস্ত কৰি ইতিমধ্যে শক্তিৰ পৰিচয় দিছে৷
ইফালে, ভাৰতৰ তুলনাত ইংলেণ্ড দলটো দিবা–নৈশ টেষ্টত কিছু পৰিমাণে অধিক অভিজ্ঞ৷ ভাৰতে ইয়াৰ পূর্বে দুখন দিবা–নৈশ টেষ্ট খেলাৰ বিপৰীতে ইংলেণ্ডে তিনিখন দিবা–নৈশ টেষ্ট খেলাৰ অভিজ্ঞতা অর্জন কৰিছে৷ অৱশ্যে দলটোৱে এতিয়ালৈকে ঘৰৰ বাহিৰত দিবা–নৈশ টেষ্টত জয়ৰ মুখ দেখা নাই৷ বার্মিংহামত ব্রিটিছ বাহিনীয়ে ৱেষ্ট ইণ্ডিজক পৰাস্ত কৰিছিল যদিও এডিলেইড আৰু অ’কলেণ্ডত পৰাজয়ৰ সন্মুখীন হৈছিল৷ ২৪ ফেব্রুৱাৰীৰ পৰা ম’টেৰা ষ্টেডিয়ামত আৰম্ভ হ’বলগীয়া মেচখন জ’ ৰুট বাহিনীৰ বাবে হ’ব গুলপীয়া বলৰ চতুর্থখন টেষ্ট৷ ইংলেণ্ডৰ তাৰকা বেগী বলাৰ জেমছ এণ্ডাৰছনে গুলপীয়া বলেৰে ভাৰতক শক্তিশালী প্রত্যাহ্বান জনোৱাৰ সম্ভাৱনা আছে৷
অৱশ্যে যশপ্রীত বুমৰাহ, ঈশান্ত শর্মাৰ দৰে তাৰকা বেগী বলাৰেৰে ঘৰুৱা দল টীম ইণ্ডিয়াও দিবা–নৈশ টেষ্টলৈ পূর্ণোদ্যমে সাজু হৈছে৷ দ্বিতীয় টেষ্টত বিশ্রামৰ পিছত বুধবাৰে বুমৰাহে দললৈ প্রত্যাৱর্তন কৰিব৷ ইফালে, দীর্ঘদেহী বেগী বলাৰ ঈশান্ত শর্মাৰ বাবে দিবা–নৈশ মেচখন হ’ব কেৰিয়াৰৰ শততম টেষ্ট৷ ভাৰতৰ হৈ টেষ্ট ক্রিকেটত ৩০০ উইকেট দখল কৰা অভিজ্ঞ বেগী বলাৰগৰাকীয়ে ২০১৪ত ৰাহুল দ্রাবিড়ৰ নেতৃত্বত ইংলেণ্ডৰ বিৰুদ্ধে টেষ্ট অভিষেক ঘটাইছিল৷