নিয়মীয়া বাৰ্তা
অসমৰ সৰ্বাধিক প্ৰচলিত দৈনিক বাতৰিকাকত

আজি খেলপথাৰত নামিব তিনিবাৰৰ চেম্পিয়ন চেন্নাই

ক’ভিডৰ আতংকৰ মাজতে মুম্বাইৰ ৱাংখেড়েত ধোনী বনাম পণ্ট

নিয়মীয়া বাৰ্তা ১০ এপ্ৰিলঃ বিগত বর্ষৰ শোচনীয় ব্যর্থতা পাহৰি তিনিবাৰৰ চেম্পিয়ন চেন্নাই ছুপাৰ কিংছে আজি আই পি এলত অভিযান আৰম্ভ কৰিব৷ মহামাৰী ক’ৰোনা ভাইৰাছৰ প্রাদুর্ভাৱে আতংক সৃষ্টি কৰা মুম্বাইৰ ৱাংখেড়ে ষ্টেডিয়ামত দর্শক অবিহনে অনুষ্ঠিত হ’বলগীয়া মেচখনত মহেন্দ্র সিং ধোনী নেতৃত্বাধীন দলটোৰ প্রতিদ্বন্দ্বী হ’ব ঋষভ পণ্টৰ দিল্লী কেপিটেলছ৷ আই পি এলৰ অন্যতম সফল বেটছমেন সুৰেশ ৰাইনাৰ প্রত্যাৱর্তনে ধোনী বাহিনীৰ শক্তি বৃদ্ধি কৰিছে৷ টপ অর্ডাৰত ৰাইনাক সহযোগ কৰিব ফাফ ডু প্লেচিছ, অম্বাটি ৰাইডু আৰু ঋতুৰাজ গাইকোৱাডে৷ ফিনিছাৰৰ ৰূপত দলত আছে অধিনায়ক ধোনী, ইংলেণ্ডৰ অলৰাউণ্ডাৰ ছেম কৰন, মঈন আলী আৰু ৰবীন্দ্র জাদেজা৷ ইফালে, নতুন অধিনায়ক ঋষভ পণ্টৰ নেতৃত্বত দিল্লী কেপিটেলছে প্রথমবাৰৰ বাবে খিতাপ জয়ৰ লক্ষ্যৰে কাইলৈ আই পি এলত অভিযান আৰম্ভ কৰিব৷ শিখৰ ধাৱন, পৃথ্বি শ্ব, আজিংক্য ৰাহানে আৰু ঋষভ পণ্টৰ দৰে বিস্ফোৰক বেটছমেনেৰে গঠিত দিল্লী কেপিটেলছৰ শিবিৰত ষ্টিভেন স্মিথ, মার্কাছ ষ্টইনিছ, ছিমৰন হেটমায়াৰ আৰু ছেম বিলিংছৰ দৰে বিদেশী তাৰকাও আছে৷ বলিঙত দলটোৰ আক্রমণ চম্ভালিব কাগিছ’ ৰাবাডা, ক্রিছ ৱকছ, ঈশান্ত শর্মা, উমেশ যাদৱ আৰু এনৰিছ নর্টজেৰ দৰে অভিজ্ঞ বেগী বলাৰে৷ তাৰকা ৰবিচন্দ্রন অশ্বিন আৰু অমিত মিশ্রয়ো দলটোলৈ মূল্যৱান অৰিহণা আগবঢ়াব৷
খেলৰ সময়ঃ সন্ধিয়া ৭.৩০ বজা৷

You might also like