নিয়মীয়া বাৰ্তা, ২৪ মাৰ্চঃ ঐশ্বর্যশালী টি–২০ লীগ আই পি এলৰ ফাইনেলৰ পিছতে বিশ্ব টেষ্ট চেম্পিয়নশ্বিপৰ বাবে ইংলেণ্ডলৈ ৰাওনা হ’ব টীম ইণ্ডিয়া৷
টেষ্ট ক্রিকেটৰ বিশ্বকাপ হিচাপে পৰিচিত বিশ্ব টেষ্ট চেম্পিয়নশ্বিপৰ ফাইনেল অহা ১৮–২২ জুনত নিউজিলেণ্ডৰ ছাউদাম্পটনত অনুষ্ঠিত হ’ব যদিও বিৰাট কোহলি নেতৃত্বাধীন দলটোৱে প্রথমে লণ্ডনত উপস্থিত হৈ কোৱাৰেণ্টাইনত থাকিব৷ হাম্পশ্বায়াৰ ক্রিকেট ব’ডৰ অধ্যক্ষ ৰোড ব্রানছগ্র’ভে এই কথা প্রকাশ কৰি কয় যে টীম ইণ্ডিয়াই এটা বৃহৎ দল লৈ লণ্ডনত বিশ্ব টেষ্ট চেম্পিয়নশ্বিপৰ প্রস্তুতি চলাব৷
নিউজিলেণ্ডৰ বিৰুদ্ধে ফাইনেলত নমাৰ পূর্বে কোনো প্রস্তুতি মেচ নথকাৰ প্রতি লক্ষ্য ৰাখি ভাৰতীয় ক্রিকেট নিয়ন্ত্রণ ব’র্ডে এটা বৃহৎ দল প্রেৰণৰ প্রস্তুতি চলাইছে৷ ফাইনেলৰ পূর্বে ভাৰতীয় খেলুৱৈসকলৰ মাজতে অতি কমেও দুখন ৱার্মআপ মেচ অনুষ্ঠিত হ’ব৷ এইদৰে টীম ইণ্ডিয়াই বিশ্ব টেষ্ট চেম্পিয়নশ্বিপৰ ফাইনেললৈ সাজু হ’ব বুলি হাম্পশ্বায়াৰ ক্রিকেট ব’ৰ্ডৰ মুৰব্বীগৰাকীয়ে জানিবলৈ দিছে৷
উল্লেখ্য যে বিশ্ব টেষ্ট চেম্পিয়নশ্বিপৰ ফাইনেল ক্রিকেটৰ মক্কা লর্ডছত অনুষ্ঠিত হ’ব বুলি আৰম্ভণিতে প্রকাশ পাইছিল যদিও মহামাৰী ক’ভিড–১৯ৰ প্রট’কলৰ বাবে মেচখন ছাউদাম্পটনলৈ স্থানান্তৰ কৰা হয়৷