শৰীৰ শকত হৈ যেতিয়া চর্বিৰ পৰিমাণ বাঢ়ি যাব, তেতিয়া আপুনি এই কথাত নিশ্চিত হ’ব যে আপোনাৰ শৰীৰত ৰোগৰ পৰিমাণো বৃদ্ধি হৈছে৷ শৰীৰৰ ওজনক লৈ আজিকালি বেছিভাগ মানুহেই সচেতন৷ তেওঁলোকে অতিৰিক্ত ওজন কমোৱাৰ আটাইতকৈ সহজ পন্থাটো গ্রহণ কৰে, অর্থাৎ লঘোনে থকা৷ এইক্ষেত্রত যুৱতীসকলৰ আগ্রহ একেবাৰে বেছি৷ অৱশ্যে কিছুমান আনুষংগিক কাৰণে তেওঁলোকৰ এই প্রৱণতাক উৎসাহ দিছে৷ নামী–দামী প্রায়বোৰ কোম্পানীৰ মডেলসকলৰ চেহেৰা হাডে–ছালে লগা৷ যিসকলৰ ডিঙিৰ হাড সুস্পষ্ট, তেওঁলোকহে ভাল মডেল হিচাপে চিহ্ণিত হয়৷ সেয়ে ফেশ্বন শ্ব’ থাকিলে তেওঁলোকে খোৱা–লোৱা সম্পূর্ণ বাদ দিয়ে৷ অলপতে মুম্বাইত হোৱা এটা ফেশ্বন শ্ব’ৰ পিছত কেইবাগৰাকী প্রতিষ্ঠিত মডেল হাস্পতালত ভর্তি হ’ব লগা হৈছিল৷ চিকিৎসকৰ মতে খীণাবৰ বাবে কেইবাদিনো উপবাসে থকাৰ বাবেই তেওঁলোকৰ শৰীৰৰ এই দুৰৱস্থা হৈছিল বুলি সদৰী কৰিছে৷ চিকিৎসকৰ মতে পুষ্টি গুণেৰে ভৰা খাদ্য খোৱাটো আমাৰ শৰীৰৰ বাবে অতি প্রয়োজনীয় কথা৷ এইক্ষেত্রত ভাৰতীয় খাদ্য বিশেষজ্ঞ দীপা টমাছে কেইটামান নিয়ম উল্লেখ কৰিছে৷
* তেলত ভাজি খাবৰ বাবে সদায় ননষ্টিক বাচন ব্যৱহাৰ কৰক৷
* পৰাপক্ষত দিনটোৰ খাদ্যৰ ৭৫ শতাংশই সিজোৱা বা সেকা খাব পাৰিলে অতি ভাল৷
* চেনি খোৱাটো বন্ধ কৰক৷
* দুপৰীয়া আৰু ৰাতিৰ আহাৰ কেতিয়াও নোখোৱাকৈ নাথাকিব৷
* খাবৰ সময়ত এখন সৰু থালত আহাৰ খাব লাগে, যাতে কম পৰিমাণতে থালখন ভৰি থাকে৷ থালখনৰ চাৰিওকাষ এনেদৰে সজাব লাগে যাতে দেখিলেই মন ভৰি পৰে৷
* সম্পূর্ণ পেট ভৰাই আহাৰ নাখাব৷ শৰীৰত বেছি ষ্ট্রেছ নিদিব৷
* দৈনন্দিন কাম–কাজৰ লগত আপোনাৰ ওজন ল’বলৈ নাপাহৰিব৷
* প্রতিদিনে আইনাৰ সন্মুখত থিয় হওক আৰু নিজকে ভালদৰে
নিৰীক্ষণ কৰি প্রশংসা কৰক৷ এনেদৰে এমাহ কৰি চাওকচোন, আপুনি দেখাত বহুত ধুনীয়া হোৱাৰ লগতে শৰীৰৰ বহু ৰোগো নোহোৱা হ’ব৷