নিয়মীয়া বাৰ্তা ,৩০ জানুৱাৰীঃ আজাৰা আৰক্ষী থানা এলেকাৰ এয়াৰ ফোৰ্চ গেটত ৩৭ নং ৰাষ্ট্ৰীয় ঘাইপথত আজি পুৱা সংঘটিত এক ভয়ংকৰ পথ দুৰ্ঘটনাত এজন লোক থিতাতে নিহত হোৱাৰ উপৰি আন দুজন লোক আহত হয়।নিহত লোকজন হ’ল ছয়গাঁও থানা এলেকাৰ ধনঞ্জয় ৰাভা আৰু আহত দুজন ক্ৰমে ছয়গাঁও থানা এলেকাৰ ফুলশ্বৰ দাস আৰু ৰমানন্দ দাস।
জানিব পৰা মতে আজি পুৱা মিৰ্জাৰ পৰা আহি থকা বালি ভৰ্তি As 25/EC 9349 নং ডাম্পাৰ এখনৰ লগত গুৱাহাটীৰ ফালৰ পৰা গৈ থকা AS EC 4162 নম্বৰৰ 909 ট্ৰাকখনৰ লগত মুখামুখি সংঘৰ্ষ হয়।সংঘৰ্ষত ট্ৰাকখনৰ সন্মুখ ভাগ চূৰ্ণ বিচূৰ্ণ হৈ যায়।ফলত ট্ৰাকখনৰ চালক ধনঞ্জয় ৰাভাৰ থিতাতে মৃত্যু হয়।ট্ৰাকখনত অহা আন দুজন শ্ৰমিক ক্ৰমে ফুলেশ্বৰ দাস আৰু ৰমানন্দ দাস গুৰুতৰ ভাবে আহত হয়।
ঘটনাৰ খবৰ পোৱাৰ লগে লগে আজাৰা যানবাহন আৰক্ষী ঘটনাস্থলিত উপস্থিত হৈ আহতসকলক ততাতৈয়াকৈ আজাৰা প্ৰাথমিক স্বাস্থ্য কেন্দ্ৰত ভৰ্তি কৰায়।পিচত দুৰ্ঘটনাগ্ৰস্ত দুয়োখন গাড়ীকে আজাৰা থানালৈ লৈ অনা হয়।