নিয়মীয়া বাৰ্তা, ৫ ফেব্ৰুৱাৰীঃ: নাহৰকটীয়াৰ মাজমজিয়াত থকা কুঞ্জলতা ল’জ নামৰ হোটেলখনৰ পৰা কালি নিশা স্থানীয় আৰক্ষীয়ে এটা বাইকচোৰ গ্ৰাপ্তাৰ কৰিবলৈ সক্ষম হয়। দুলীয়াজান, নাহৰকটীয়া, নামৰূপ এলেকাৰ অতি কমেও ১১ খন বাইক চুৰিৰ ঘটনাত জড়িত থকা বুলি সন্দেহ কৰা বাইকচোৰটো যোৰহাট চোলাধৰাৰ নিৰ্মল গগৈ (২৫) বুলি চিনাক্ত কৰা হৈছে ৷ ইয়াৰ পূৰ্বেও বাইক চুৰি অপৰাধৰ বাবে টীয়ক আৰু সাপেখাতী আৰক্ষী থানাই চোৰটোক গ্ৰেপ্তাৰ কৰিছিল। উল্লেখ্য যে নাহৰকটীয়া থানাত ৰুজু হৈ থকা১২/২২ নম্বৰৰ গোচৰ সন্দৰ্ভত নগালেণ্ড আৰক্ষীৰ পৰা নাহৰকটীয়া আৰক্ষীয়ে চোৰটোৰ তথ্য লাভ কৰে ৷ ইতিমধ্য আৰক্ষীয়ে আ.ই কোম্পানীয়ে নিৰ্মাণ কৰা এখন হিমালয়ান বাইক উদ্ধাৰ কৰিবলৈ সক্ষম হৈছে ৷ বাইকচোৰৰ সমস্ত ৰেকেটটোক উৎখাত কৰিবলৈ আৰক্ষীয়ে জোৰদাৰ তদন্ত চলাই আছে ৷
প্ৰতিবেদকঃ বুলন শইকীয়া / নাহৰকটীয়া