নিয়মীয়া বাৰ্তা, ১৮ ফেব্ৰুৱাৰী : পশ্চিম যোৰহাটৰ চাংচোৱা সেউজী সংঘৰ উদ্যোগত তিনিদিনীয়া কাৰ্যসূচীৰে স্বৰ্গীয় সুভাষ তাঁতী সোঁৱৰণী চলন্ত ট্ৰফী আৰু প্ৰাইজমনি দিবা-নৈশ ভলীবল প্ৰতিযোগিতা অনুষ্ঠিত হয়। চাংচোৱা সেউজী সংঘৰ সম্পাদক দিপাংকৰ কেওঁটে জানিবলৈ দিয়া মতে, প্ৰতিযোগিতাত মুঠ ১৬ টা ভলীবল দলে অংশগ্ৰহণ কৰে।
চূড়ান্ত খেলখনত চাংচোৱা এচ এন জি ক্লাৱক ৩-১ চেটৰ ব্যৱধানত পৰাস্ত কৰি খুমটাই ভলীবল দলটিয়ে চূড়ান্ত বিজয় সাব্যস্ত কৰে। বঁটা বিতৰণৰ উদ্দেশ্যে সেউজী সংঘৰ স্থায়ী সভাপতি গুণাৰাম তাঁতীৰ সভাপতিত্বত এখন সভা অনুষ্ঠিত হয়। সভাত চাংচোৱা চাহ বাগিছাৰ মুখ্য পৰিচালক দিগন্ত বিজয় বৰা, জ্যেষ্ঠ চিকিৎসক ডাঃ প্ৰণৱ কুমাৰ বৰদলৈ, ৭৩ নং মধ্য ঠেঙাল খঙীয়া বাগিছা গাঁও পঞ্চায়তৰ সভানেত্ৰী পূৰ্ণিমা কেওঁটকে প্ৰমুখ্য কৰি কেইবাজনো জ্যেষ্ঠ অতিথিয়ে অংশগ্ৰহণ কৰে।